Сунтаардааҕы «Тандем»  атыы-эргиэн киинин аптекатыгар фармацевт-провизор идэлээх урбаанньыт Наталья Спиридонова үлэлиир. Кини дьоҥҥо-сэргэҕэ мэлдьи эйэҕэс сыһыаннаах, куруук сүбэлиир-амалыыр, сөптөөх эмтэри булан-талан биэрэр.

Наталья Федоровна Дьаархантан төрүттээх. Дьаархан оскуолатыгар учуутал идэлээх ийэтэ Саввинова Мария Петровна химияны, биологияны, онтон 9-10 кылаастарга Уһун Күөлгэ Кларова Ксения Прокопьевна химияны үөрэппиттэр. «Үчүгэйдик, интэриэһинэйдик үөрэтэллэр этэ. Ол иһин химияны сөбүлээбитим» диэн этэр Наталья Федоровна. Онон буолуо, кини оҕо эрдэҕиттэн медик буолар баҕалааҕа. Дьокуускай куоракка медицинскэй училищеҕа фармацевт идэтигэр туттарсан киирбит.

Икки сыл үөрэҕин бүтэрээт, Бүлүү куоратыгар аптекаҕа идэтинэн үлэлээбит. Онтон Сунтаар тыаларыгар, киинигэр, салгыы Дьокуускайга үлэлээбит. Идэтин үрдэтинээри Томскай куоракка Сибиирдээҕи судаарыстыбаннай медицинскэй университетыгар провизор идэтигэр кэтэхтэн алта сыл үөрэммит.

Ол кэнниттэн Сунтаарга аптечнай пуун арыйбыт. Үлэлиирин устатын тухары аныгы кэм сиэринэн квалификациятын мэлдьи үрдэтинэр, билиитин өрүү хаҥатар. Аҕыйах сыллааҕыта идэтинэн өр сыл бэриниилээхтик, үчүгэйдик үлэлээбитин иһин «Саха Өрөспүүбүлүкэтин фармациятын туйгуна» аат иҥэриллибит. Уопсайа аптекаҕа 40 сыл үлэлээбит.

Төрөппүт уола ийэтин туйаҕын хатаран, медицина өттүгэр барбыт. Ол курдук, ХИФУ мединститутугар быраас үөрэҕэр алта сыл үөрэнэн бүтэрбит. Билигин ординатураҕа үөрэнэ сылдьар.

Түгэнинэн туһанан, Наталья Федоровнаны ааспыт Фармацевт күнүнэн уонна быйыл үбүлүөйдээх сааһын томточчу туоларынан итиитик-истиҥник эҕэрдэлиибит! Чэгиэн-чэбдик доруобуйаны, Үлэҕэр-хамнаскар өссө да үрдүк ситиһиилэри баҕарабыт.

Айталина Ефремова

«Сунтаар сонуннара»