Новости
Таатта предпринимателэ Билии күнүн көрсө сүүс букеты бэлэхтиэҕэ
14 августа 2019

«Сибэкки бэйэтэ кэрэ буоларга ананан айыллыбыт дьылҕатынан, өрүү чэлгийэ, кэрэхсэл көстүүнү уонна уйаҕас үөрүүнү бэлэхтии туруохтаах» диэн санааны өрө тутар Ытык Күөл олохтооҕо Зинаида Ильинична Николаева. Кини дьиэ кэргэнинээн үһүс сылын Билии күнүн көрсө, кэлбит дьоҥҥо барытыгар, кими да матарбакка, сибэккитэ баарын тухары буор босхо бэлэх уунар.


Бу бэлиэр күһүн аайы Таатта дьоно күүтэр-кэтэһэр хамсааһына «кэрэчээнэ сибэккилэрбин таах уулуссаҕа таһааран ыһан кэбиһиэм оннугар, дьоҥҥо, оҕо-аймахха бэлэхтээн, кинилэри үөртэрбин, туох эрэ туһаны аҕалларбын» диэн толкуйтан үөскээбит. Бастакы сыл биллэрии ыытарын кытта, бэл, Туора Күөлтэн тиийэ кэлэн, сибэкки дьөрбөлөрүн хомуйан, ыал ыалынан олус үөрэн, махтанан барбыттарын Зинаида Ильинична Николаевадолгуйа кэпсиир. Ол күннэргэ олбуорга баппат элбэх киһи кэлбитэ диэн ахтар.

— Былырыын атырдьах ыйын 29 күнүттэн саҕалаабытым. Икки күн тура дьон кэлэн букет оҥорон үөрэн-көтөн барбыттара, — диир.

Быйыл эмиэ бу үгэһин салҕаата. — Букет оҥорорго табыгастаах уонна сүрүннээн өр хаппакка турар тулуйумтуо сибэкки көрүҥнэрин ыһан тэлгэһэбэр киһи хаампат гына олортум, — диэтэ.

Зинаида Ильинична бэйэтэ маҕаһыыннаах киһи быһыытынан элбэхтик айанныыр, кэлэр-барар. Бу үгүөрү түбүктээх үлэтиттэн быыс булан, сибэкки кып кырачаан сиэмэттэн саҕалаан чэлгийэ үүнэн, тиэргэнэ тобус — толору араас өҥнөөх дьэрэлийэр көстүүнэн киэргэниэр, симэниэр диэри бары түһүмэҕэр оҕолуу бүөбэйдиир, илиитин араарбакка көрөр-истэр. Үлэтинэн ыраах айаҥҥа турунар, тэрийбит «Алдаана» ансаамбылын кытта куонкурустарга кыттар кэмигэр — рассада буоллун, сибэкки буоллун – Зинаида Ильинична хараҕын харатын курдук харыстыыр күөх баайа бүүс-бүтүннүү кэргэнэ Николай Кимович кыһамньылаах көрүүтүгэр киирэр.

Быйыл 30-ча көрүҥ сибэкки аата-ахсаана биллибэт элбэх араскытын муус устар бутэһик күннэригэр оттуллар теплицэлэригэр таһаарбыттар. Зинаида Ильинична петунияны наһаа сөбүлээн, барыларыттан ордорон, элбэҕи үүннэрэрин кэпсиир. Маны тэҥэ быйыл тэлгэһэтигэр өрүү буоларын курдук, бархатцы, астра, циния, гвоздика, роза араас көрүҥэ, сухоцветтар ону тэҥэ аан бастакытын миэтэрэттэн тахса үрдүктээх георгиннар үрүҥ күнү батыһа үүннүлэр.

«Хаһыҥ түһэн салаан ааспатар уонна сибэккилэрим «кырдьыбатахтарына» атырдьах ыйын 29 күнүттэн сибэккилэрбин дьоҥҥо-сэргэҕэ биэрэр былааннаахпын», — дии хаалла.

 

Автор: Жанна БУРМИСТРОВА

Есть вопрос?
Позвони 8-800-100-58-80