Новости
Абый улууһугар сааскыттан саҕалаан окко бэлэмнэннилэр
11 июля 2018

Улууска нэһилиэктэринэн Абый 750, Дьооску 360, Майыар 218, Муҥурдаах 427, Уолбут 133, Ураһалаах 41 туонна оту оттуур былааннаахтар. Сааскыттан саҕалаан бэлэмнэнии үлэтэ ыытылынна. Хаһаайыстыбалар тиэхиньикэлэрин өрөмүөннээтилэр, саппаас чаастарын, уматыгы-оҕунуоҕу атыыластылар. Онон тэриллиилээх уонна кэтэх хаһаайыстыбалар оҥостон олороллор. «Талахтаахха» Анатолий Стручков — «Тирэх» ТХПК оттуу сылдьар. «Буур Хаайбыкка» Валерий Никулин — «Муҥурдаах» ТХПК ходуһаҕа бүгүн киирэр.

Абый улууһугар кыстык этэҥҥэ түмүктэннэ. Дьон-сэргэ сүөһүлэриттэн-астарыттан илиилэрин соттубат туһугар кыһын устата дирээлэһэн үлэлээтилэр. Хайдах-туох дьаһанан олороллорун туһунан оройуоннааҕы тыа хаһаайыстыбатын управлениетын салайааччыта Р.Г. Калининскай кэпсээтэ:

— От ыйын 4 күнүнээҕи туругунан оройуон 555 сүөһүлээх, 220 ынахтан 145 ньирэйдээхпит. Күҥҥэ ортотунан ыанньык ынах алта лиитирэ үүтү биэрэр. Оттон сылгыбыт ахсаана 1111 төбө, ол иһигэр 283 биэ төрөөтө. Сүөһү дороххой аһылыгын хаалбыт саппааһа 150, комбикорм 25, эбиэс 4 туонна баар. Нэһилиэк баһылыктара күһүн идэһэ саҕана олохтоохторго өйдөтөр үлэни күүскэ ыытаннар тустаахтар сүөһү ахсаанын быһа-хото кыччаппатылар.

Сибиинньэбит 48, ол иһигэр 5 ийэ, 42 сибиинньэ оҕотун ыллыбыт. Нэһилиэктэр түргэнник ситэр салааҕа интэриэстэнэн иһэллэрэ үөрдэр. Усуйаанаттан 111 табаны аҕалбыппыт. Билигин 6 тугуттаахпыт. Инникитин да төрүөҕү биэриэхтэрэ. Кэлэр сылга өссө үрдүк былааны ылынар туһунан толкуйдуубут.

— Окко киириигэ тэрээһин үлэ хайдаҕый?

— Саха Өрөспүүбүлүкэтин тыатын хаһаайыстыбатын министиэристибэтэ оройуоҥҥа 1923 туонна от былаанын биэрбитэ. Сорук булгуччу туолуохтаах, оччотугар эрэ үүнэр кыстыгы туоруохпут. Улуус баһылыга Станислав Цюхцинскай от ыйын 4 күнүгэр оттооһун хампаанньатыгар месячник биллэрдэ. Болдьох иһигэр былаан 70 бырыһыана хайаан да туолуохтаах. Оройуон дьаһалтатын өртүттэн хонтуруол күүһүрүөҕэ, миэстэтигэр

нэһилиэктэр баһылыктарыттан ирдэбил улаатыаҕа. Тыа хаһаайыстыбатын исписэлиистэрэ чуолкай көрдөрүүнү биэриэхтээхтэр. Оттооһуҥҥа былырыыҥҥы курдук мобильнай биригээдэлэр үлэлиэхтэрэ, оройуон баһылыгын туруорсуутунан иккис сылын олохтонно.

Ааптар: Афанасий ИВАНОВ.

Хаартыска интернеттэн.

Есть вопрос?
Позвони 8-800-100-58-80