Новости
Абый улууһугар ынах сүөһү, сылгы ахсаана сыллата эбиллэр
2 апреля 2021

Төрүөх элбээн, тыа ыалыгар сааскы түбүк үксээтэ. Абый улууһун тыа хаһаайыстыбатын управлениетын салайааччыта Михаил Ефимов сүөһүгэ, сылгыга кыстык хайдах ааспытын уонна билиҥҥи балаһыанньаны билиһиннэрдэ.

– Абый улууһа сүрүннээн ынах сүөһү ииттэр улуус буоллаҕа? Кыстык хайдах ааста?

– Ааспыт 2020 сыл сайыныгар куһаҕана суохтук оттооммут, билигин күөххэ диэри оппут тиийэр. Кыстык этэҥҥэ ааста. Ыран охтубут сылгы, ынах суох. Ынах сүөһүнү тутар 42 хаһаайыстыбалаахпыт. Сылгыны 41 ыал уонна 15 бааһынай хаһаайыстыба иитэр. Кулун тутар 29 күнүнээҕи көрдөрүүнэн, Абый оройуонун сиригэр-уотугар уопсайа 526 төбө ынах сүөһү баар. Ол иһигэр ыанар ынаҕа – 226. Төрүөх – 70 ньирэй. Сылгыбыт ахсаана – 916, ол иһигэр биэтэ – 564. Кулун төрүөҕэ – 4. Ынах сүөһү, сылгы ахсаана сыллата эбиллэр.

Кыһыҥҥы суолунан Абый уонна Уолбут нэһилиэктэрэ уопсайа 14,8 туонна комбикорму, 5,25 туонна эбиэһи тиэйэн аҕалан сайаапкалаахтарга түҥэттилэр. Бу күннэргэ ураһалаахтар уонна муҥурдаахтар эмиэ эбии аһылык күүтэллэр.

– Михаил Михайлович, билигин Дьокуускай куоракка командировкаҕа сылдьаҕыт, тугу ситистигит?

– Бастатан туран, үөрүүлээх сонуммуттан саҕалыам. 2020 сыл ахсынньы 16 күнүнээҕи 842 № бирикээскэ олоҕуран, улууска тыа хаһаайыстыбатын сайдыытыгар государствоттан көмө үп көрүллүбүтэ. Үп тыырыллыытыгар үгүс үлэ, кэпсэтии ыытылынна.

Бу күннэргэ хаһаайыстыбалаахтар анал счеттарыгар 50%-на түһүө, хаалбыт суумата күһүн быһаарыллыа. Уопсайа 4 мөл. 194 тыһ. 253 солк. тыырылынна. Мантан 34 тус бэйэ бас билиитин хаһаайыстыбалаахтар төрүүр ынахтарыгар 1 мөл 735 тыһ. 500 солк. (төбөтүгэр 35 тыһ. солк.), сулумах урбаанньыттарга 641 тыһ. 902 солк., тэриллиилээх хаһаайыстыбалар төрүүр ынахтарыгар – 1 мөл. 324 тыһ. 402 солк. Сүөһүлээх кэтэх хаһаайыстыбалаахтарга – 227 тыһ. 500 солк.

10-тан элбэх төрүүр биэлээх сулумах урбаанньыттарга – 69 тыһ. 750 солк. (төбөтүгэр 1 тыһ. 500 солк.), тэриллиилээх хаһаайыстыбаларга – 93 тыһ. солк. уонна кэтэх хаһаайыстыбалаахтарга – 25 тыһ. 500 солк тыырдылар.

Дьиэ табатын сайдыытыгар 79 тыһ. 699 солк. Бу тыа хаһаайыстыбатын сайыннарарга улахан хамсааһын.

Иккиһинэн, “Тыа сирин территорияларын тупсаран оҥоруу” бырагырааматыгар дьиэ тутуутугар көмө – Абый нэһилиэгин Алексей Климовскай дьиэ кэргэнигэр. Быйыл республика үрдүнэн 28 эрэ квота көрүллүбүт.

Тыа хаһаайыстыбатын министиэристибэтэ управлениеҕа анаан «Фермер» массыына биэрдэ. Бу биһиэхэ улахан көмө.

Александра ЗАРОВНЯЕВА

Подробнее: ulus.media