Бэс ыйын 14 күнүгэр Абый улууhугар уустук олохтоох ыалга, кэтэх хаһаайыстыбаларга уонна урбаанньыттарга анаан социальнай контракт нөҥүө көмө үп көрүллүүтүн тыырар хамыыһыйа мунньаҕа буолла. Хамыыһыйа улуус баһылыгын солбуйааччы Алексей Павлов уонна тустаах тэрилтэ үлэһиттэрэ кыттыылаах ыытылынна.

«Хамыыһыйа мунньаҕар түөрт сайабылыанньа киирбитин көрдүбүт. Ол курдук, Кэбэргэнэттэн биир уустук олохтоох ыалга ас уонна таҥас ылыналларыгар, биир ыал кэтэх хаһаайыстыба тэринэригэр, чуолаан теплица туттарыгар уонна оҕуруот аһын үүннэрэн эбии үп харчы киллэринэригэр 250 тыһыынча солкуобайы көрдүбүт. Маны таһынан Майыартан уонна Ураһалаахтан элбэх оҕолоох икки ыал бурдук аһы астыыр ИП тэринэригэр 258 уонна 300 тыһыынча солкуобай көмө харчы көрүллэр буолла», — диэн социальнай харысхал управлениетын салайааччыта Айдар Ефимов иһитиннэрдэ.

Даҕатан эттэххэ, дьиэ сүөһүтүн ииттэргэ анаан кэтэх хаһаайыстыба, ИП тэринэргэ хамыыһыйа аатыгар олохтоохтортон сайыбылыанньа күүтэллэр.

«Хотугу Кыым» хаhыат