8-800-100-58-80

Новости
Абыйга Анатолий Стручков сибиинньэ иитэн хаһаайыстыбатын кэҥэтэр
30 июля 2018

Абый нэһилиэгин хоһууна Анатолий Стручков «Үлэ диэн баран муннукка ытаабыт» дьонтон биирдэстэрэ. Хас да сыллааҕыта сүөһү, сылгы иитэр «Тирэх» СХПК-ны тэрийбитэ. 73 төбө сүөһүттэн аҥара ыанар ынах, оттон 59 сылгыттан 29-һа биэ. Оройуон салалтатын этиитин өйөөн аны сибиинньэ иитэргэ тирэх хаһаайыстыбаны тэрийдэ.

 

Абыйга Анатолий Стручков хаһаайыстыбатыгар былырыын сэтинньигэ кэлбит 6 сибиинньэ 42 бороһуонагы төрөттө. Түргэнник ситэр салааҕа киирсибит нэһилиэктэр сайаапканан сибиинньэ оҕолорун атыылаһан көрөн, улаатыннаран торолуттулар. Сакаас салгыы киирэр.

 

Анатолий Васильевич «Талахтаах» диэн ходуһатыгар ким хайа иннинэ хотууру ыллаппыта. Сэттэ киһилээх биригээдэ толору механизированнай. Биэс тыраахтардаах, 3 скоростной охсордоох, прессподборщиктаах, онон илии үлэтэ суоҕун кэриэтэ. «Тирэх» быйыл оттооһуҥҥа былаана 250 туоннаны бэлэмнээһин. От ыйын 21 күнүнээҕи туругунан 96 туонна от чөкөтүлүннэ. Маны таһынан Абый анныгар 100-чэ туоннаҕа чугаһыыр от охсулла сытар. Кылгас кэм иһигэр сүрдээх тэтимнээх хамсаныы таҕыста.

 

Күн-дьыл өссө туран биэрдэҕинэ Анатолий Стручков салгыы күөх быйаҥы эбии сомсуоҕа.

 

 «Хотугу Кыым» хаһыат