×

Следите за новостями в Telegram-канале Центра «Мой бизнес» Якутии

Читать
Новости "Центра "Мой бизнес"
Александр Фомин: «Оҥоһуллар көмө үлэлииргэ кыах биэрэр»
27 июня 2022

Иккис килиэбинэн ааттаммыт хортуоппуйу үүннэрэр Александр Фомин тыа хаһаайыстыбатын салаатыгар оҥоһуллар судаарыстыба оҥорор өйөбүлэ билигин баар санкцияларга саамай көмөлөөх буолбутун этэр. Ааспыт күһүн 500-тэн тахса тонна хортуоппуй үүнүүтүн ылан нэһилиэнньэни толору хааччыйбыта.

«Тас дойдулар санкция биллэрбиттэрэ биир өртүнэн олохтоох оҥорон таһаарааччылар күүскэ хамсаналларыгар, үлэлэрин кэҥэтэллэригэр кыах биэрдэ диэххэ сөп. Холобура биһиги оҕуруот аһынан дьарыктанааччыларга судаарыстыба өртүттэн араас өйөбүллэр оҥоһуллубуттара, үлэлииргэ-хамсыырга санааны күүһүрдэр, көтөҕөр даҕаны. Ол курдук сиэмэ хортуоппуй ставкатын улаатыннарбыттара, удобрениены ыларга субсидия көрбүттэрэ. Инньэ гынан быйыл ыһыыбыт иэнин улаатыннардыбыт. Амма улууһун хортуоппуйунан толору хааччыйабыт диэххэ наада.

Саас 100-чэкэ тонна сиэмэ хортуоппуйу атыылаан, нэһилиэнньэ барытын атыыласпыта. Онон манна дефицит суох этэ. Ааспыт сылга саҥа хортуоппуй харайар ыскылаат оҥостон киллэрбиппит. Манна эмиэ судаарыстыба өйөбүлэ күүс-көмө буолбута. Ол суоҕа буоллар бары ирдэбиллэргэ эппиэттиир ыскылааты туттар кыахпыт суох буолуо этэ. Маннык анал температураны тутар сирдээх буолан, хортуоппуйбут хаачыстыбата быдан үчүгэй буолан, хамаҕатык барыта атыыга барбыта, сүтэрии суоҕун кэриэтэ диэххэ наада. Маннык усулуобуйалаах буолан быйылгыттан сиэмэ хортуоппуйунан дьарыктанар хаһаайыстыбалар реестрдэригэр киирдибит. Ол быһыытынан өрөспүүбүлүкэтээҕи сир сулууспатын кытта Сөбүлэһии түһэрсэн Сахабыт сирин икки суорт хортуоппуйун элбэтиигэ үлэлэһиэхтээхпит. Онно быйыл «Тунгускай» уонна «Якутянка» диэн суортары үүннэрэн саҕалаатыбыт.

Маны биһиги былаан быһыытынан элбэтиэхтээхпит. Бу икки сорт биһиги климаппытыгар сөп түбэһэллэр. Ол курдук холобура «Тунгусскай» диэн эрдэ ситэр суорт, онтон «Якутянка» курааҥҥа игин бэриммэт суорт буолар. Онон дьэ иннибитигэр элбэх үлэ күүтэр. Иэммит кэҥээн үлэһиттэрбит элбээтилэр. Бу курдук санкцияларга бэриммэккэ, бэйэбит дойдубутугар бэйэбитин бэйэбит хааччынан хайа баҕарар олорор кыахтаахпыт. Үлэбитинэн-хамнаспытынан өрөспүүбүлүкэбит дьоно-сэргэтэ сибиэһэй аһы аһыылларыгар күүс-көмө буолабыт.

Бэйэ оҥоруутунан дьарыктанааччылар үлэлиир хайысхабытын кэҥэтэн, ханнык да тастан киирэр кыһарыйыыларга оҕустарбат туһугар үлэбитин ыытыахтаахпыт. Оччотугар биһиги дойдубут күүстээх буолуо. Киниэхэ тапталбыт билигин хайаатар да күүстээх буолуохтаах. Ол тапталбытын үлэбитинэн көрдөрүөхтээхпит дии саныыбын. Ыччаттарбыт бэйэлэрин дойдуларыгар хаалан күүскэ үлэлиэхтэрин, билиилэрин биэриэхтэрин наада. Билигин биһиэхэ үлэлиир дьон эдэр ыччат дьон буолаллар. Кинилэр эмиэ сайдан, тирэх ылан аһынан-үөлүнэн хааччыйар тыа хаһаайыстыбатын салаатыгар үлэлиэхтэрэ диэн эрэллээхпин», — диэн фермер Александр Фомин санаатын үллэһиннэ.

 

Источник