Новости
«Алпекс+» тэрилтэ дьон-сэргэ туһугар үлэлиир
24 января 2017

Петр Михайлов Мэҥэ Хаҥалас улууһугар, Майа сэлиэнньэтигэр күн сирин көрбүтэ, Үөһээ Бүлүүгэ ойор-тэбэр оҕо сааһа ааспыта. 2002 сыллаахха М.Т.Егоров аатынан 2-с №-дээх орто оскуоланы ситиһиилээхтик түмүктээн, Дьокуускайдааҕы атыы-эргиэн, экономическай колледжка туттарсан киирбитэ, 2005 сыллаахха түмүктээбитэ. Онтон управление институтугар «Государственнай уонна муниципальнай управление» идэтигэр үөрэммитэ, билигин ХИФУ-га юрист идэтигэр кэтэхтэн үөрэнэр.

Петр 2011 сылтан ыла «Алпекс+» тэрилтэни иилээн-саҕалаан салайар. Бу тэрилтэ үс хайысханан үлэлиир. Ол курдук, бастакытынан, олох-дьаһах коммунальнай өҥөтө, иккиһинэн, ыраас «Хотун Бүлүү» уу, үсүһүнэн, кумах, буор тиэйээһинэ киирэр. Олох-дьаһах коммунальнай өҥөтүгэр туттубут ууларын төлөбүрэ, бөх-сыыс тиэйээһинэ, канализация оботторооһуна уонна өрөмүөн үлэтэ киирэр. «Алпекс+» хааччыйыытыгар үгүс толору хааччылыылаах квартиралар уонна биирдиилээн чааһынай дьон дуогабар нөҥүө бааллар. Олохтоохтор тэрилтэ ыҥырыытынан бириэмэттэн бириэмэтигэр субуотунньуктарга тахсаллар, олорор квартираларын тулата ыраас буоларын туһугар кыһаллар дьон аҕыйаҕа суохтар. ОДьКУ аан бастаан үлэтин саҕалыырыгар аҕыйах техникалаах, үлэһиттэрдээх буоллаҕына, билигин уу баһар, бөх тиэйэр анал массыыналара элбэх буолан үлэ күөстүү оргуйар.

Иккис хайысхаҕа улууска бастакы «Хотун Бүлүү» ыраас уута киирэр. Петр 2014 сыл олунньутугар бэйэтин күүһүнэн ууну ыраастыыр сыаналаах тэриллэри атыылаһан, таҥан туруоран, атырдьах ыйыгар арыйан үлэлэппитэ. Бүлүү өрүс уутун анализтатан, мөлтөҕүн быһааттаран, бу тэриллэри сакаастаабыта. Производственнай бааза Октябрьскай уулуссатыгар үлэлии-хамныы турар, күннэтэ элбэх уу ыраастанар. Өрүс уута аан бастаан анал киэлитигэр (емкость) кутуллар, ол кэннэ алта төгүл фильтрацияны ааһар. Бу фильтрация кумаҕы, кири-хоҕу ыраастыыр, ол кэннэ амтан бэриллэр, салҕыы ыраас киэлитигэр түһэн бактериялары өлөрөр ультрафиолетовай сырдатыыны ааһар. Түмүккэ, сиикэйдии иһэргэ сөптөөх бастакы категориялаах ууну ылаллар.

«Алпекс+» тэрилтэҕэ сүрүн ыстаакка 3 киһи үлэлиир, оттон 7-лэр дуогабар баттаһан сылдьаллар. Хас биирдии үлэһиккэ нолуок уонна пенсионнай төлөнөр, сайыҥҥы уонна кыһыҥҥы үлэ таҥаһа көрүллэр. «Улууспутугар үлэлиэн баҕалаах дьон аҕыйах буолан, дуогабарынан үлэлэтэрим судургу. Тоҕо диэтэр, эрдэ үлэлии сылдьыбыт дьон хамнастарын ыллылар даҕаны сүтэн хаалааччылар. Хомойуох иһин, үлэлиэн баҕалаах киһи аҕыйах. Билигин үлэлии сылдьар дьоммун төһө кыалларынан биһирии сатыыбын, утары барабын, оччоҕуна эрэ кини үлэтин патриота буолар», — диэн кэпсээтэ.

Улууспутугар ыраас уу баар буолуоҕуттан ыла, оҕо тэрилтэлэрэ биир-биир истиһэн, оскуолаларыгар, оҕо саадтарыгар туруорар буоллулар. Ол курдук, Кэнтик, Нам, улуус киинигэр 2-с №-дээх, 4-с №-дээх орто оскуолалар, 7-с №-дээх «Сказка» уһуйаан ыраас уунан үөрэнээччилэрин, иитиллээччилэрин хааччыйаллар. Маны таһынан, улуус дьаһалтата, 36-с №-дээх аптека, «Алмаасэргиэнбаан», «Сбербаан» тэрилтэлэрэ эмиэ ыраас ууну иһэллэр.

2014 сыллаахха улуус дьаһалтата урбаанньыттары өйөөн, субсидиялары анаабыта. Манна Петр 100 тыһ. солк. харчылаах субсидияны ылан, уу кутуллар иһиттэрин атыылаһан эргинэр. Аан бастаан уу атыылаһар киһи 600 солк. төлүүр, оттон салҕыы ыларыгар иһитин төннөрөн, биир мөһөөхтүүгэ уу атыылаһар. Бу төннөрүллүбүт иһиттэр анал химическэй обработканы ааһаллар, маны Петр күүстээх хонтуруолга ылар.

Маны таһынан, Петр «Бэрэ» иккис уокуругар депутатынан үлэлиир-хамныыр. Кини этиитинэн, туруорсуутунан Ленин уулуссаҕа оҕо оонньуур площадкатын туттарбыта. Хас сессия, мунньах ахсын ымпыгын-чымпыгын билэр, «Благоустройство» тиэмэтигэр араас боппуруостары туттарсар, этии киллэрэр.

Эдэр, эрчимнээх салайааччы билигин даҕаны былаана киэҥ-куоҥ. «Хотун Бүлүү» ууну кыра бытыылкаларга кутан улууһу барытын хабан атыылыыр баҕа санаалаах: «Бу баҕа санаам олоххо киирэригэр, анал тэриллэри сакаастаан ылыахтаахпын, эбии үлэ миэстэлэрин таһаарыам. Биһиги улууспутугар ыытыллаары турар Манчаары оонньууларыгар уубун атыылыахпын, Бүлүү өрүс уута диэн көрдөрүөхпүн баҕарабын. Сайыннардахпына, Бүлүү түбэтин улуустарыгар атыыга ыытыам, улууспут аатын ааттатыам». Маны таһынан, Петр уу куттааһынын туочукатын арыйыан баҕарар. Оччоҕуна, ким баҕалаах төһө баҕарар ууну бүдүөнүнэн, иһитинэн ылыан сөп буолар уонна төлөбүрүн лиитиринэн төлүүр кыахтанар. Бу этиини сэлиэнньэ баһылыга Николай Николаев биһирээбитэ, сөбүлэҥин биэрбитэ.

Петр – улуус патриота. Үөһээ Бүлүүнү сайыннарар, олохтоохторун доруобай, бигэ туруктаах гынарга ис дууһатыттан дьулуһар.

Автор: Мария ВАСИЛЬЕВА

Есть вопрос?
Позвони 8-800-100-58-80