Салон хаһаайката Снежана Ивановна Назарова кулун тутар 31 күнүгэр Аммаҕа киирэн социальнай хантыраак хамыыһыйатыгар бу бырайыагын көмүскээн хантыраакка илии баттаспыта. Муус устар 20 күнүгэр харчыта түһэн Дьокуускайтан суол сабылларын баттаһа салонун тээбиринин барытын атыылаһан, тиэйэн аҕалан, сыа-сым курдук тутан номнуо үлэлииргэ бэлэм оҥордо. Бэйэ дьыалатын тэринэргэ кэргэнэ Пётр Михайлович уонна икки өттүттэн төрөппүттэрэ көх-нэм буоланнар олбуордарыгар баар кыра дьиэлэрин оҥостон бэртээхэй салону арыннылар.

Хаһаайка туһунан кыратык билиһиннэрэр эбит буоллахха, олоҥхо дойдута Сунтаартан төрүттээх Алтан уран тарбахтаах талба кийиитэ буолар. Снежана Ивановна бэйэтэ акушер идэлээх, өр кэм балыыһаҕа үлэлээбитэ.

Оҕо эрдэҕиттэн кэрэҕэ тардыһар кыысчаан, сүрэҕэр иитиэхтээн сылдьыбыт баҕа санаатын толорон, бэйэтин идэтинэн үлэтин ааспыт сыл тохтотон, бэйэ дьыалатын тэринэргэ быһаарынар. Олоҕун суолун атын хайысханан эргитэн кэрэ эйгэтин талар.

Бу баҕа санаата туоларыгар төһүү күүс буолбут судаарыстыба көмөтүгэр — социальнай хантыраакка махтала муҥура суох.

Снежана Ивановна сатаабата диэн бука суоҕа буолуо. Кини уран тарбахтаах иистэнньэҥин таһынан иллэҥ кэмигэр сөбүлүүр биир дьарыгынан минньигэс тортары астааһын буолар. Кини оҥорбут тортарын амсайбатах киһи арааһа нэһилиэккэ аҕыйаҕа буолуо. Маны сэргэ бэртээхэй гамактары өрөр, остуол светильниктэрин, торшердары, киэргэллэри, ытарҕалары, броштары ис дууһатын ууран туран оҥорор. Ылыста да барытын тиһэҕэр тириэрдэр булгуруйбат санаалаах.

Үс оҕолоох дьиэ кэргэн иһирэх ийэтэ оҕолорун, кэргэнин эмиэ бу кэрэ эйгэҕэ сыһыаран бары биир киһи курдук тэҥҥэ сылдьаллар, көх-нэм буолаллар.

Бүгүҥҥү үөрүүлээх түгэҥҥэ нэһилиэк ытыктанар киһитэ, үөһэттэн айдарыылаах Мотрена Ивановна Григорьева — Чугдаара Хотун бэйэтинэн кэлэн алгыстаан-арчылаан эдэр дьоҥҥо баҕа санаа бастыҥын, ыра санаа ылбаҕайын анаата, үрдүктэн үрдүк, саҥаттан саҥа ситиһиилэри баҕаран санааларын кынаттаата.

Салон бэрт тупсаҕайдык оҥоһуллубутун ыалдьыттар биһирии көрдүлэр. Судаарыстыба өҥөтө анаммыт сыалынан-соругунан сөпкө туһаныллыбытын хайҕаатылар. Миэбэллэрэ барыта үрүҥ уонна хара өҥүнэн дьүөрэлээн ылыллыбыттара бэрт сэргэхтик көстөр. Клиеннэргэ анаан тирии хахтаах кыра дьыбаан, чэй, кофе иһэргэ аналлаах үрүҥ остуол, олоппостор киһи хараҕар тута быраҕыллаллар.

Билиҥҥи хамсык кэмигэр саамай наадалаах салгын ырааһырдар рециркулятор, тэриллэри ултрафиолетовай сардаҥаларынан кичэллээхтик ыраастыыр, дезинфекциялыыр стерилизатор ылыллыбыттара Снежана Ивановна медик идэлээҕин туоһулуур.

— Салон аатыгар тохтуур эбит буоллахха, «Ньургуһун» диэн аат мээнэҕэ буолбатах, эдьиийим Ньургуйаана Ивановна Ермолаева аатын санатар уонна аҕам айбыт ырыатын аата. Эдьиийим барахсаҥҥа Амма кэрэ сиригэр ыҥыран, көрдөрөн, Алтаны ис сүрэхпиттэн таптаан иккис дойду оҥостон олорорбор махталым муҥура суох. Бу сибэкки тоҥтон иҥнибэккэ саас аайы сир кырсын тобулан үрүҥ күҥҥэ талаһарын сэргии көрөбүн, — диэн сэһэргиир салон хаһаайката Снежана Назарова.

Түмүккэ ыра санааҕыт олоххо киирэн сэргиир дьарыккытын сөргүтэн эрэргитинэн ситиһиилээх үлэни, тиһигэ быстыбат килийиэннэри, саҥа салону арҕаа халлаан архаан тыала хоппотун, эркинигэр илин халлаан ибир сиигэ хоммотун, уһун кыһын бу хосторго сылам куйаас сыдьаайдын, уоттаах сайын сүөгэй сөрүүн сөҥүөрдүн диэн баҕа санаабытын анаатыбыт.

Сиһилии хаартыскалары бу сигэнэн киирэн көрүҥ.