Амма улууһугар коронавируснай инфекция тарҕаныыта аччаабат. Күннэтэ ыалдьыбыт киһи ахсаана эбиллэр. Дьон-сэргэ, өҥөнү оҥорор тэрилтэлэр төһө ирдэнэр, сэрэтэр миэрэлэри тутуһулларын хонтуруоллуур рейдэ полиция сотрудниктара кыттыылаах ыытылынна.
“Маннык рейдэлэрбитин сотору-сотору ыытабыт. Хомойуох иһин ыарыыбыт аччыыр балаһыанньаҕа киирэ илик. Дьон тоҕуоруһар, өҥөнү оҥорор тэрилтэлэргэ сылдьан температураларын мээрэйдэнэр сурунаалларын бэрэбиэркэлиибит, харыстанар средстволара баарын көрөбүт уонна вакциналаммыттарын хонтуруоллуубут. Бүгүн сылдьыбыт маҕаһыыннарбытыгар уонна атыы-эргиэн ырыынагар ирдэнэр балаһыанньаны тутуһаллар эбит. Ол гынан баран сорох үлэһиттэр өссһ да вакцинацияны бара иликтэр, эбэтэр вакциналаммыттарын туоһулуур справканы илдьэ сылдьыбаттар. Кинилэри Роспотребнадзор салаатыгар кэлэллэригэр ыҥырдыбыт”, — диэн Роспотребнадзор Амма улууһугар салаатын салайааччыта Айаллаана Романова этэр.
Чахчы да сылдьыбыт маҕаһыыннарбытыгар барытыгар маасканы кэтэ сылдьыы, мааската суох дьоҥҥо атыылаабаппыт, дистанцияны тутуһуу туһунан суруллан тураллар. Ол гынан баран сорох сирдэргэ дистанцияны тутуһар линиялар эргэрэн, сотуллан хаалбыттарын саҥардарга сүбэлээтилэр. Бу сылдьан көрдөххө, дьон кэм мааскатын кэтэн сылдьар эбит. Атыылааччылар бары эмиэ харыстанар мааскалаахтар.
“Мин бэйэм иккис вакцинациябын атырдьах ыйын 30 күнүгэр баран ылбытым. Бары дьиэ кэргэнинэн вакциналамыппыт. Маннык атыы-эргиэн тэрилтэтигэр үлэлиир киһи хайаатар да мааскалаах, вакциналаах буолуохтаах дии саныыбын. Элбэх киһи сылдьар, онон харыстанар наада. Мин санаабар хас биирдии киһи баар балаһыанньаны өйдөөн вакцинацияны барыахтаах дии саныыбын”, — диэн “Аартык” атыы-эргиэн киинин атыылааччыта Ольга Макарова санаатын үллэстэр.
Амма киинигэр саамай улахан атыы-эргиэн киининэн Людмила Куприянова салайар маҕаһыыннара буолаллар. Манна сылдьан эмиэ бэрэбиэркэлээтилэр. Саамай үчүгэйэ диэн бу тэрилтэ үгүс үлэһитэ бары вакцинацияны барбыттар.
“Баар балаһыанньаны барытын өйдөөн туран ирдэбиллэри тутуһарга кыһаллабыт. Вакцинацияны үлэһиттэрбиттэн ирдиибит. Ковиды утары үлэһиттэргэ инструктаж ыытар анал киһи сыһыарыллыбыта. Кини барыларын температураларын кээмэйдиир, сурунаалы толорор. Кэлэр нэдиэлэҕэ бүтэһик 4 киһибит вакциналаннахтарына, биһиги тэрилтэбит 100 бырыһыан вакцинацияны ааһабыт. Биллэн туран маннык рейдэлэр наадалар. Дьон бэйэтин доруобуйатыгар болҕомтолоох буолуон наада”, — диэн Людмила Еремеевна санитарнай ирдэбили тутуһуу тоҕо баар буолуохтааҕын бэрт сөпкө быһаарар.
Амма улууһугар күн бүгүн балыыһаҕа сытан 36 киһи, таһыттан олорон 169 киһи коронавируснай инфекциянан ыалдьан эмтэниини ааһар. Бу сыыппара аччыырын туһугар бука бары кыһаллыахтаахпыт, вакцинацияны ааһан эмчиттэргэ көмө буолуохтаахпыт.