Амма улууһун Соморсун нэһилиэгин олохтооҕо, элбэх оҕолоох дьиэ кэргэн аҕа баһылыга Виталий Тарабукин уонна Абаҕаттан эдэр удьуор сылгыһыт Спиридон Тимофеев өрөспүүбүлүкэ 38 киһитин иһигэр киирсэн «Агростартап-2021» көрүүтүн ааһаннар саҕалааччы бааһынай хаһаайыстыба салайааччылара буоллулар.

Виталий Тарабукин, бааһынай хаһаайыстыба салайааччыта, Соморсун нэһилиэгэ: «Оҕо сылдьан 1991 сылтан сылгыларга сыстан барбытым. Маҥнай Данил Иннокентьевич Кутуковка, онтон Николай Петрович Поповка сылдьарым, ат баайар Иван Иванович Ивановка ат сүүрдэн, сайынын оттоһон, күн бүгүнүгэр диэри сылгынан дьарыктанабын. Кэнники уон сылга ылсан анаан иитэбин. Биһиги нэһилиэккэ сылгынан Николай Павлов, Василий Нестерев, Алексей Караканов бааһынай хаһаайыстыбалаахтар. Бааһынай хаһаайыстыба салайааччыта буолуон баҕалаах киһи эрдэттэн бэлэм буолуохтаах. Сирдээх — уоттаах, ходуһалаах, сылгылардаах, тиэхиньикэлээх, бырыһыаны төлөһөр харчылаах буолара ирдэнэр. Ол аата анаан дьарыктана сылдьар киһиэхэ грант улахан көмө буолар. Нэһилиэктэн 40 — ча км тэйиччи сытар Бэрэ үрэҕэр баар базабар салгыы оҥостон үлэлиэм.

Бэйэм дьиэм — уотум баар буолан, харчыбынан күрүө — хаһаа, гараж туттуом, оттуур тиэхиньикэ уонна үчүгэй төрүөҕү биэрэр биэлэри, атыырдары ылыныам. Кыстык оппун булунан олоробун. Үлэбэр Семен Борисов көмө буолуоҕа. Сылгы, бастатан туран, этэ сыаналанар. Үчүгэй төрүөҕү ылыан баҕалаах киһиэхэ сылгыны иитии олус ыарахан үлэ. Үчүгэйдик көрдөххө — иһиттэххэ, сылгы бэйэтин ороскуотун боруостуур».

Спиридон Тимофеев, бааһынай хаһаайыстыба салайааччыта, Абаҕа нэһилиэгэ: «Бэйэбин өйдүөхпүттэн икки эһэлэрбин, аҕабын батыһан сылгыга сыстан улааппытым. Биллэр сылгыһыт Гаврил Михайлович Семеновтан элбэххэ үөрэммитим.

Билигин сүрүн сүбэһитим аҕам Василий Васильевич буолар. Ийэм Анна Эрнестовна сылгынан бааһынай хаһаайыстыба салайааччыта этэ. Кини сылгыларын ыламмын салгыы дьарыктанар, ахсаанын элбэтэр баҕалаахпын. Граҥҥа иккис сылбар тигистим, онон үөрүүм улахан. Тыа хаһаайыстыбатын министиэристибэтигэр, улууһум, нэһилиэгим дьаһалталарыгар, тыа хаһаайыстыбатын салалтатыгар миигин өйөөбүттэригэр улахан махталбын тириэрдэбин. Сылгы иитиитигэр хаһаайыстыба салайааччытын быһыытынан үлэлээн — хамсаан истэххэ үлэ түмүктэрэ көстөн иһиэхтэрэ. Харчыбынан тыраахтыр уонна оттуур тиэхиньикэбин ылыныам. Базам Абаҕаттан чугас Бэс Күөлгэ баар. Нэһилиэк чугаһынан, Хайырҕаһынан, Туора Үрэҕинэн оттуубун. Сайыҥҥы өттүгэр Москубаҕа ат сүүрдэбин, кыһын дойдубар сылгыларбар кэлэбин.

Быйылгы ситиһиим диэн Казань куоракка дойду таһымнаах ат сүүрдүүтүгэр кыайыылааҕынан буоллум».

Алтана Артемьева
Источник