Амма урбаанньыттара уонна тэрилтэлэрин салайааччылара Саха сиригэр Урбаанньыттар күннэрин көрсө “төгүрүк остуолга” кытыннылар. Кэпсэтии хамсык кэминэн сибээстээн зуум платформанан барда. Амма улууһугар урбаан сайдыытын тула кэпсэтиини “Мин биисинэһим” киин тэрийэн ыытта, киин сэбиэдиссэйэ Владимир Колосов модератор буолла. Кэпсэтии өрөспүүбүлүкэҕэ ыытылла турар урбаанньыттарга анаммыт Форум чэрчитинэн барда. “Төгүрүк остуол” кыттыылаахтарын улуус баһылыгын бастакы солбуйааччы Иннокентий Климентов эҕэрдэлээтэ уонна кэпсэтиигэ кыттан санаатын эттэ, улуус урбаанньыттарыгар көмөлөрүн, көхтөөх үлэлэрин иһин махталын тириэртэ.
Ити курдук улуус кылаабынай бырааһа Михаил Архипов, “Биисинэс инкубатор” дириэктэрэ Евгений Афанасьев, Роспотребнадзор Амма улууһугар салаатын салайааччыта Айаллаана Романова, Дьокуускайдааҕы тыа хаһаайыстыбатын техникумун Амма улууһугар рабочай кадрдары бэлэмниир киинин салайааччыта Марфа Дмитриева, улуустааҕы дьарыктаах буолуу киин дириэктэрэ Лена Вензель, улуус депутата, меценат Людмила Куприянова, “Амма олоҕо” хаһыат кылаабынай эрэдээктэрэ Наталья Бубякина кыттыыны ылан санааларын, көрүүлэрин тириэртилэр. Бу кэнниттэн “төгүрүк остуол ” кыттыылаахтара бэйэлэрин боппуруостарын биэрдилэр.
“Бүгүҥҥү кэпсэтиибитигэр 50-тан тахса киһи кытынна. Наадыйар боппуруостарын биэрэн эппиэттэри ыллылар. Хамсык кэмэ да буолан буолуо, үгүстүк доруобуйа харыстабылын өртүгэр биэрдилэр. Ол иһигэр тэрээһин, өйөбүл өттүнэн эмиэ боппуруостар киирдилэр. Маны сэргэ иннинкитин маннык кэпсэтиилэри ыытар наадатын, онно нолуок инспекциятыттан бэрэстэбиитэллэр баар буолуохтарын ыйдылар. Урбаан күнэ Сахабыт сиригэр бастакы Президеммит Михаил Ефимович Николаев анал Ыйааҕынан 2001 сылтан бэлиэтэнэр. Билигин урбаанньыттар өрөспүүбүлүкэ да, улуус да социальнай-экономическай олоҕор ураты миэстэни ылалларын бары билинэллэр. Онон даҕаны кинилэргэ болҕомто уонна өйөбүл ууруллар диэххэ наада. Амма улууһун бары урбаанньыттарын, бэйэлэрин дьыалаларын тэринэн олохторун уйгутун оҥосто сылдьар биир дойдулаахтарбытын кэлэн иһэр Урбаанньыттар күннэринэн истиҥник эҕэрдэлиибин. Кинилэргэ махталлаах клиеннэрэ элбии туралларыгар, үлэһиттэрэ эппиэтинэстээх буолалларыгар уонна биллэн туран биисинэстэрэ сайда, чэчирии, үбү-харчыны киллэрэ турарыгар баҕарабын. Бука барыларыгар туйгун доруобуйаны, олохторугар дьолу-саргыны”, — диэн Владимир Владимирович санаатын тириэртэ.