Новости
Аммаҕа туһалаах семинар ыытылынна
20 июля 2021

Амма улууһугар Дьокуускайдааҕы тыа хаһаайыстыбатын техникума онлайн эрэсииминэн агростартапка кыттыан баҕалаахтарга уонна саҥа саҕалааччы фермердарга аналлаах семинар ыытта. Бааһынайдар семинартан элбэх туһалааҕы билбиттэрин бэлиэтээтилэр.

Амма улууһун дьаһалтатын аактабай саалатыгар буолбут семинарга  тыа хаһаайыстыбатын исписэлиистэрэ, кэтэх хаһаайыстыбалаахтар, бааһынайдар уонна тыа хаһаайыстыбатын управлениетын үлэһиттэрэ, уопсайа  барыта 37 киһи кыттыыны ылла. Семинар саҕаланыан иннинэ улуустааҕы тыа хаһаайыстыбатын управлениетын салайааччыта, баһылык солбуйааччыта Ион Кононов эҕэрдэлээтэ уонна тэрийээччилэргэ махтанан, кыттааччылар өйдөммөт боппуруостарын быһаарсан, элбэх саҥа билиини ылалларыгар баҕарда.

Онлайн семинары Дьокуускайдааҕы тыа хаһаайыстыбатын техникумун исписэлииһэ, Амма улууһугар оробуочай кадры бэлэмниир киин салайааччыта Марфа Дмитриева салайан ыытта. Олус сэргэх иһитиннэриилэри, сүбэлэри уонна саҥа уларыйыылар тустарынан, “Агростартап”  граныгар кыттыы бэрээдэгин өрөспүүбүлүкэ бааһынай фермерскэй хаһаайыстыбаларын  уонна кооперативтарын Ассоциацияларын толорооччу дириэктэрэ Зарема Романовна Бочкарева уонна АПК ресурснай хааччыйыытын киинин  экономиһа Майя Степановна Гуляева билиһиннэрдилэр уонна бэриллибит элбэх ыйытыыларга хоруйдаатылар.

Дьокуускайдааҕы тыа хаһаайыстыбатын техникумун методическэй сулууспатын салайааччыта, тыа хаһаайыстыбатын билимин кандидата Марианна Кимовна Тимофеева сүөһү аһылыгын бэлэмнээһин, сүөһүгэ төһө аһылык барыахтааҕын сөптөөхтүк ааҕыныы, тыа хаһаайыстыбатын билимин кандидата, техникум преподавателэ Елена Николаевна Ильина агробизнес тустарынан олус наадалаах иһитиннэриилэри оҥордулар. Ону тэҥэ семинар кыттыылаахтарыгар сир сокуонугар  улуустааҕы КУМИ салайааччыта Михаил Трифонов, нолуокка уларыйыылары нолуок инспекциятын исписиэлииһэ Василина Стручкова, бэйэни дьарыктаах оҥоруу боппуруоһугар “Мой бизнес” киин Амма улууһугар филиалын сэбиэдиссэйэ Владимир Колосов кэпсээтилэр.

“Бары кыттыбыт бааһынайдар, саҥа саҕалааччылар да бу семинартан олус астынан тарҕастылар. Бары иһиттэнниилэр, ол эбэтэр Граны суруйуу, Агростартапка кыттыы,  боруода сүөһүлэри иитии, кормопроизводство, сир үлэтигэр сыһыаннаах  уонна да атыттар бары олус интэриэһинэйдэр. 2019-20 сылларга Агростартапка кыттан Гран ылбыт, саҥа саҕалыан да баҕарааччылар бэйэлэрин интириэһиргиир боппуруостарын биэрэн, сөптөөх уонна толору эппиэттэри ылан тэрийээччилэргэ махталларын эттилэр. Өссө семинар кэнниттэн “Агростартап”  Граныгар кыттааччылар уонна саҕалааччы  фермердар семинарга кыттыбыттарын туоһулуур сертификаты уонна  көмө матырыйааллары, брошюралары тутуохтара, сорохтор туттулар. Семинары ыытааччылар элбэх боппуруос киирбититтэн эмиэ астыннылар. Дьоммут төһө отторугар сырытталлар бириэмэ булан кытыннылар, онтон үөрэбин”, — диэн этэр улуус бааһынайдарын Ассоциациятын бэрэссэдээтэлэ Александра Цыпандина.

Онтон маннык билиҥҥи кэмҥэ олус туһалаах уонна суолталаах семинары тэрийэн ыыппыт Дьокуускайдааҕы тыа хаһаайыстыбатын техникумун исписэлииһэ, Амма улууһугар оробуочай кадры бэлэмниир киин салайааччыта Марфа Дмитриева тыа хаһаайыстыбатын управлениета, бааһынайдар ассоциациялара сайыҥҥы былдьаһык күннэргэ дьоннорун кытыннарбыттарыттан астынарын уонна махтанарын эттэ.

UlusMedia