Амма улууһугар дьон-сэргэ сөбүлээн сынньанар. Ол эрээри бу билиҥҥи кэмҥэ диэри былаана суох, норуокка этэллэринии „дьиикэй“ туризм быһыытынан тэриллэн кэллэ диэххэ сөп. Аҕыйах сылтан бэттэх, „туризм“ диэн өйдөбүл киирэн, улууска дьон-сэргэ бу өттүнэн урбаан эйгэтигэр кэлэн эрэллэр. Онон туристическай базалар тэриллэн, атын сиртэн кэлэн дуоһуйа сынньанан баралларыгар усулуобуйалар кэм баар буоллулар. Ол эрээри бу барыта өссө да итэҕэс, элбэх быһаарыллыахтаах боппуруостар элбэхтэр. Маныаха улуус өрөспүүбүлүкэ салалтатын кытта ыкса үлэлэһэн „Амма улууһугар туристическай рекреационнай кластер концепциятын“ оҥорон бу күннэргэ сүрэхтээтилэр.

Концепцияны биһиэхэ өрөспүүбүлүкэ туризмҥа Агенствотын салайааччыта Наталья Владимировна Тюкавкина билиһиннэрдэ. Манна кини Амма улууһугар туризм хайдах сайдыахтааҕын, онно туох оҥоһуллуохтааҕын кэпсээтэ.

Концепция оҥоһуллуутун сүрүн сыалынан бу эйгэни былааннаахтык сайыннарыы буолар. Ол эбэтэр туризм сайдыыта анал бырагыраамаҕа олороҕуран барыахтаах. Тоҕо диэтэр кини сайдыыта аҥардас улуус эрэ бюджетиттэн эрэ буолбакка, манна өрөспүүбүлүкэ, федеральнай уонна инвестордар үбүлээһиннэрэ эмиэ туһаныллыахтаах. Ол барыта бу концепцияҕа анал бырагыраама быһыытынан олоҕуран үбүлэниэхтээх. Сыл устата улуус дорожнай картатын оҥорон таһаарыахтаахпыт. Ол барыта этаптарынан араарыллар. Концепция ис тутулун кылгастык билиһиннэрэр буоллахха, манна турист Амма улууһугар кэлэн ханна сынньанарын, ханна сөбүлээн түһүөҕүн, туох историческай бэлиэ сирдэр баалларын, туох айылҕа дьиктилэрэ тахсыбыттарын көрдөрөр сирдэри ырытыылар бааллар. Биллэрин курдук, билигин улууска өссө элбэх турист кэлиэҕин Өлүөнэни паромунан туорааһын хааччахтыыр курдук. 2025 сылга диэри Өлүөнэ муостата тутуллан үлэҕэ киирдэҕинэ сынньана кэлиэн баҕалаах хас эмэ төгүл эбиллиэ. Биһиги ырытан көрүүбүтүнэн сайын устата уопсай сынньанааччы ахсааныттан 10 бырыһыана эрэ базаларга кэлэн барар. Онтон 90 бырыһыана “дьиикэй туризм” буолар. Дьэ бу дьону биһиги хааччахтаабакка, кинилэр интэриэстэрин тардан, улууска элбэх үп-харчы киллэрэр гына үлэни ыытыахтаахпыт. Маны сэргэ бу концепцияҕа туристары тардыыга Аммаҕа элбэх талааннаах айар-тутар дьонноохпутун эмиэ туһаныахтаахпыт. Амма курдук кэрэ айылҕалаах сиргэ талаан үөскүүр, айымньылаахтык үлэлииргэ усулуобуйа баар гына оҥоруохтаахпыт. Быһатын концепция уопсай өйдөбүлүнэн айылҕаны кытта ситимнээн, сахалар төрүт үгэспит эмиэ киирэн атын дойду дьоно эмиэ кэлэллэрин ситиһиэхтээхпит. Амма улууһугар туризмы былааннаахтык сайыннарыыга маннык концепцияны оҥорууну Ил Дархан ааспыт сыл балаҕан ыйыгар кэлэ сылдьан улуус уонна экономика министиэристибэтин этиилэрин истэн өйөөбүтэ уонна сорудах биэрбитэ. Ол сорук бу саҕалааһына оҥоһуллан, докумуоҥҥа тиһилиннэ. Маны оҥорууга улуус сири кытта үлэҕэ кэмитиэтэ, тутууга сулууспата, урбаанньыттары түмэр биисинэс инкубатор өрөспүүбүлүкэ предпринимательствоҕа Министиэристибэтин уонна туризм сайдыытыгар Агенствотын кытта күүскэ үлэлэспиттэрэ. Билигин бу концепцияҕа олоҕуран сүрүн генеральнай былааннарбыт, улуус стратегията, атын улахан тутууларбыт барыахтара “, — диэн улуус экономикаҕа уонна былааннааһыҥҥа управлениетын салайааччыта Роман Алексеев билиһиннэрдэ.

Туризм сайдыытыгар олук уурар концепция сүрэхтэниитигэр кыттыыны улуус баһылыга Николай Архипов, „Биисинэс инкубатор“ дириэктэрэ Евгений Афанасьев, „Мин биисинэһим“ Киин салайааччыта Владимир Колосов, нэһилиэк баһылыгын солбуйааччылара,  туризм эйгэтигэр үлэлии сылдьар уонна үлэлэһиэн баҕалаах дьон кыттыыны ыллылар.

Концепия туһунан өссө сиһилии ырытан „Амма олоҕо“ хаһыакка сырдатыахпыт.