Абаҕа нэһилиэгэр олорор ынах сүөһүнү иитэр бааһынай хаһаайыстыбалаах элбэх оҕолоох ыал Кайдаловтар — улууска бастакынан агротуризм хайысхатын киллэрбит ыал. Кинилэр ытык Харама Хайатын аттыгар Түбэ диэн кэрэ миэстэлээх сиргэ аны саха ынахтарын иитэллэр.
Абаҕа кэрэ айылҕалаах Кыыс Амма кытылыгар Түбэ сиригэр Анастасия уонна Николай Кайдаловтар 2011 сылтан бааһынай хаһаайыстыба тэринэн ынах сүөһүнү иитэн саҕалаабыттара. 2016 сылтан Кыыс Амма кэрэ кытылыгар дьон сөбүлээн сынньанар өрүс кытылыгар Үрүҥ Хомо үрдүгэр «Белый мамонт» туристары көрсөр базаны үлэлэтэллэр. Оттон 2019 сылтан «Дьиэ кэргэн фермата» программанан агротуризмынан 50 миэстэлээх хотону туттан саха ынахтарын иитэллэр. Отуттан тахса ынаҕы тутаннар, дьиэ кэргэн үүтүнэн, сүөгэйинэн, суоратынан тото — хана аһыыр. Үлэһит ыал туристарга аналлаах саха олоҕун, дьарыгын толору көрдөрөр этнографическай комплекс баар буоларыгар баҕалаахтар.
«Кэнники уонча сылга манна туристар сөбүлээн сылдьар сирдэрэ буолла. Ол иһин дьоҥҥо табыгастаах буоллун диэн икки балаҕаны, икки олорор дьиэни туппуппут. Бу сайын элбэх ыалдьыт сылдьан балаҕаммытын, хотоммутун, саха ынахтарын, ону таһынан кууруссалары, индюгу куруолугу, барааны, козаны көрөн сэҥээрэн бардылар. Саха төрүт үгэһинэн өбүгэлэрбит хайдах дьаһанан үлэлээн — хамсаан, оттоон — мастаан, сүөһү иитэн олорбуттарын көрдөрөр этнографическай комплексы салгыы кэҥэтэн иһиэхпит. Бааһына сирин уларсан бурдугу, оҕуруот аһын үүннэриэхпитин эмиэ баҕарабыт. Биһиги улууспутугар агротуризм тыа хаһаайыстыбатынан сайдара ордук табыгастаах, онуоха хас биирдии нэһилиэк тус — туспа хайысхалары тутустаҕына ыалдьыттарга даҕаны, дьарыктанааччыларга даҕаны интэриэһи тардыаҕа», — диэн этэр бааһынай хаһаайыстыба салайааччыта Николай Кайдалов.