Амматааҕы анал орто интэринээт оскуоланы бүтэрбит Роман Митиненко дойдутугар Болугурга бэйэтин дьыалатын тэринэн үлэлиир.

Болугур уола Роман Митиненко үлэ суох диэн олорон хаалбакка, ыарахаттартан чаҕыйбакка, сүүрэн-көтөн судаарыстыбаттан көмө ылан, урбаанньыт буолан бэйэтин дьыалатын арынан үлэлии-хамсыы сылдьар. Оскуолатын 2018 сыллаахха бүтэрэн баран, эдьиийин батыһан, Аллараа Бэстээххэ тиийэн кафеҕа үлэҕэ киирбитэ. Онно пицца уонна суши оҥорорго үөрэммитэ. Ол үлэлии сылдьан бэйэтин дьыалатын аһарга санаммыта. 2020 сыллаахха дойдутугар Болугурга кэлэн аймахтара уонна оскуолаҕа үөрэппит учууталлара көмөлөһөннөр бизнес былааны суруйан дьарыктаах буолуу киинигэр көмүскээбитэ. 150 тыһыынчалаах граны ылан үлэлиир тэриллэрин атыыласпыта. Дьиэ уларсан алтынньы ыйтан саҕалаан суши уонна пицца оҥорон саҕалаабыта. Билигин Роман былаана элбэх, ону ситиһэргэ күннэтэ түбүгүрэр.

Оскуолаҕа үөрэнэр кэмнэригэр бастыҥ үөрэнээччини оскуола президенинэн талбыттара. Ыытыллар араас тэрээһиннэргэ кыттарын таһынан, спордунан утумнаахтык дьарыктаммыта. Доруобуйатынан хааччахтаах оҕолорго ыытыллар күрэхтэһиилэргэ мас тардыһыытыгар, аэробикаҕа, штанганы сытан эрэ анньыыга, мини-футболга өрөспүүбүлүкэ, илин эҥэр чөмпүйүөнүнэн уонна призерунан буолбута.

«Бизнес былааны суруйарга ыарахаттары көрсүбүтүм. Хата, учууталларым уонна иитээччилэрим көмөлөспүттэрэ. Бастаан саҕалыырга ыарахаттар бааллар этэ. Онтон билэн бардахха үлэлиэххэ сөп эбит. Билигин Павел Лонгинов диэн уолу кытта иккиэ буолан үлэлиибит. Суши уонна пицца оҥоробут. Сакаас күннэтэ киирэр. Маннык үлэлиирбин сөбүлүүбүн», – диэн этэр урбаанньыт Роман Митиненко.

Издание: «Газета «Амма олоҕо»»
Ааптар: Гаврил Чемезов
Источник: https://ulus.media/2021/04/02/amma-bolugurugar-roman-mitinenko-bejetin-dyalatyn-terinen-leliir/