Амма Чапчылҕаныгар олорор тимир ууһа Георгий Олесов-Дьулус Уус саха төрүт дьарыгар ылсан үлэтин саҕалаата. Ити курдук удьуор утумунан бэриллибит дьоҕурунан иккис сылын үлэлиир.

Аммалар күтүөттэрэ Чапчылҕаҥҥа олорор Уус Алдан Сыырдааҕыттан төрүттээх СӨ уустарын сойууһун чилиэнэ, тимир ууһа Георгий Олесов саҕалаан эрэр дьарыга киниэхэ аҕатын өттүнэн бэриллибит.

Айылҕаттан айдарыылаах төрүттэрэ удьуордаан тимиринэн уһаналлара. Ааспыт үйэҕэ таҥара дьиэлэрин тэриллэрин, киэргэллэрин, кириэстэрин, дьон көрдөһүүтүнэн киһи уҥуохтарын оҥоһуктарын бэлэмнииллэрэ. Аҕата Афанасий Петрович Олесов өрөспүүбүлүкэтээҕи үгүс быыстапкалар кыайыылаахтара буолар.

Оттон Георгий бииргэ төрөөбүт убайа Альберт Олесов Москваҕа ыытыллыбыт «Клинок – традиции и современность» диэн норуоттар икки ардыларынааҕы 37-с быыстапка кыайыылааҕа буолар.

Эдэр уус Амматааҕы «Мой бизнес» диэн тэрилтэнэн реклама, полиграфия өҥөтүнэн Дьулус Уус диэн уһуйуллубут аатынан логотиптаах баннеры, сувенир хоппотун, таҥаһын-сабын тэриммитэ. Билигин бэйэтин күүһүнэн дьаптайар, сытыылыыр станоктары ылыммыта.

Биисинэс былаанын суруйан урбаанньыт быһыытынан толору ситэн-хотон уһанар үлэтигэр олохтоохтук ылсар баҕалаах. Билигин 2000 кыраадыска тиийэ ититэр күөрдүн аҕата кэлэн оҥорон халыҥ тирииттэн, оҕус кутуругуттан кыыннаах быһахтары, анньыыны уһанар.

Сылгыһыт, булчут дьоҥҥо ыксаллаах балаһыанньаҕа сиэмэх кыыллартан көмүскэнэргэ аналлаах анньыы, сүгэ буолар батыйаны эмиэ оҥорор. Бу сылга «Дархан Уус» XI өрөспүүбүлүкэтээҕи быыстапкаҕа кыттан уопуттаах уустар үлэлэрин билистэ.

Бөтүҥҥэ күтүөт буолбут землеустроитель идэлээх уол Аммаҕа кэлээт маҥнай кэргэнин Майя Майевна «Бэрт» маҕаһыыныгар атыыһыт быһыытынан үлэлээбитэ. Билигин биэс оҕолоох улахан дьиэ кэргэн аҕа баһылыга уус буолар дьоҕурунан дьарыктанар былааннаах. Оҥоһуктара бу маҕаһыыҥҥа атыыга тахсаллар, ону тэҥэ быһаччы дьон сакааһынан үлэлиир.

Айылҕаттан айдарыылаах биир дойдулааҕа Матрена Григорьева-Чугдаара Хотун бэлиэтииринэн, Майаҕатта Бэрт Хараттан тардыылаах Мүрү эбэ кытылын Майаҕас уонна Сыырдаах ыччата, уус удьуордаах айылгытынан ис кыахтаах, күүстээх сүрүннээх, сиэрдээх сэмэй майгылаах эдэр киһи инникитэ киэҥ.

«Бастаан тимирбин чочуйабын, ону укка олордобун, кыыммын тигэбин. Биир быһах нэдиэлэни быһа оҥоһуллар буолан соҕотох киһиэхэ бытаан. Билигин дьаптайар, сытыылыыр, сыһыарар станоктардаахпын. Үлэлиир дьиэлээх, толору станоктардаах, көмөлөһөр дьонноох буолуохпун баҕарабын. Тимир ууһа буолар уустук идэ. Икки сыл уһанным диэтэхпинэ, аҕабыттан, убайбыттан күн аайы ымпыгар-чымпыгар тиийэ сүбэлэтэ олоробун. Биилээҕи уһанарым быһыытынан быһахпын саҥа хаһаайыҥҥар хайҕабылы ыла сырыт диэн үөрэ-көтө сылдьар кэммэр алгыспын иҥэрэн оҥоробун», – диэн этэр Георгий Олесов-Дьулус Уус.

Ааптар: Алтана Артемьева
Подробнее: ulus.media