Амма Сэргэ Бэһигэр хортуоппуйу үүннэрэр фермер Александр Фомин бааһынай хаһаайыстыбата быйылгы былаанын толордо. Биир улахан ситиһиитинэн хортуоппуйу харайар аныгылыы таҥыылаах улахан тутуутун үлэҕэ киллэрбитэ буолар. Маны таһынан үгэс быһыытынан көмөҕө наадыйааччыларга көмөтүн оҥорор.
Сэргэ Бэскэ хортуоппуйу үүннэрэр бааһынай хаһаайыстыба салайааччыта Александр Фомин өрөспүүбүлүкэҕэ киэҥник биллэр фермер. Кини бу дьылга 55 гектар бааһынатыттан баалабайынан 500 туонна хортуоппуйу хомуйда. Аны аныгы технологиянан оҕуруот аһын харайар саҥа тутуута түмүктэннэ. Батарыы чааһынан кууһунан ылааччыларга хас эмэ массыына хортуоппуй тиксэрилиннэ, Амма, Чурапчы маҕаһыыннарыгар эмиэ тиэрдилиннэ. Нэһилиэнньэ балаҕан ыйын 10 күнүттэн саҕалаан хортуоппуйу удамыр сыанаҕа киилэтэ 65 солкуобай харчыга атыылаһа олорор. Маны таһынан эдэр фермер көмөҕө наадыйар улууспут дьонугар — сэргэтигэр сыл аайы хортуоппуйун түҥэтэр. Ол курдук «Үктэл» чөлүгэр түһэрэр кииҥҥэ биир массыына, улуустааҕы тыа хаһаайыстыбатын бэтэрээннэригэр, «Арассыыйа ийэлэрэ» хамсааһын түһэрбит сайаапкатынан уонна биирдиилээн олохтоохторго көмөлөһөр.
«Быйыл биһиги эҥээр оҕуруот аһыгар чэпчэкитэ суох дьыл ааһан эрэр. Ол эрээри уонча сыл үлэлээбит уопуппутунан үүнүүбүтүн син ыллыбыт. Сайыммыт кураан буолан тохтоло суох уу ыстарыытыгар ороскуоттаах буолла. Арай күһүн күн — дьыл туран биэрдэ. Хортуоппуйу харайар микроклиматы тутар аныгылыы технологиянан таҥыылаах тутуубутун үлэҕэ киллэрдибит. Маны таһынан 600 туонна сенаһы бэлэмнээн дьаарыстаан бүтэрдибит. Мантан аҥаара сүөһү иитиитинэн дьарыктанар бааһынай хаһаайыстыбалаах аҕабытыгар Константин Матвеевичка барыаҕа, аҥаарын атыыга таһаарыахпыт. Эһиил хортуоппуйум бааһынатын кэҥэтэр былааннаахпыт. Туохха да кыайтарбат сыыс отун тохтоторго паардааһын ньыматын боруобалыахпыт. Быйыл «розарабыт» төрүөҕэ аҕыйах, ол эрээри бөдөҥ, саҥа боруобалаан олордубут маҥан «гала» диэн суорпут кырахымаала элбэх буолан быраҕары тулуйбат эбит. Ити курдук сыл аайы үлэбитигэр туох эрэ саҥаны киллэрэн холонон көрөбүт», — диэн кэпсиир хаһаайыстыба салайааччыта Александр Фомин.