Новости
Амма механизатордара бастыҥы быһаарыстылар
16 июля 2022

Соморсуҥҥа ыытыллыбыт улуус механизатордарын күрэстэрэ өрөспүүбүлүкэҕэ сири оҥоруу уонна бурдугу ыһыы 350, тыа хаһаайыстыбатын министиэристибэтэ 100, Амма Солобуодата тэриллибитэ 370 уонна «Соморсун», «Үрүйэ» ТХПК 30 сылларыгар ананна.

Күрэхтэһии үөрүүлээх чааһа Соморсун нэһилиэгин ыһыахтыыр былаһааккатыгар ыытылынна. Эҕэрдэ тылы тыа хаһаайыстыбатын министиэристибэтин үүнээйи, мелиорация, материальнай-техническэй хааччыйыы, информатизация департаменын салайааччытын солбуйааччы Василий Бессонов, министиэристибэ сири кытта үлэҕэ сулууспатын салайааччыта Афанасий Семенов, улуус баһылыга Николай Архипов, тыа хаһаайыстыбатын улуустааҕы салалтатын салайааччыта Ион Кононов, олохтоох нэһилиэк баһылыга Алексей Кононов эттилэр. Тыа хаһаайыстыбатыгар кылааттаах үлэһит дьон наҕараадалары туттулар. Ол курдук Абаҕаттан Елизавета Данилова «СӨ агропромышленнай комплексын бочуоттаах үлэһитэ», «Тыа хаһаайыстыбатын министиэристибэтэ 100 сылл» бэлиэнэн Соморсунтан Трофим Белолюбскай, Николай Кононов, Михаил Дьячковскай, Ольга Заборовская, Болугуртан Михаил Ксенофонтов, «Саха сирин тыатын хаһаайыстыбатын бэтэрээнэ» Абаҕаттан Егор Михайлов, министиэристибэ Бочуоттаах Грамотатынан уонна бэлиэтинэнэн Болугуртан Иван Дьячковскай, Бөтүҥтэн Константин Тарбахов, министиэристибэ Махтал Суругунан Абаҕаттан Алексей Павлов, Николай Атласов,

Бөтүҥтэн Дмитрий Новиков, улуус салалтатын Махтал Суругунан Семен Борисов, Валерий Григорьев, Чакыртан «Кэскил» хаһаайыстыбаттан Семен Григорьев, Тимофей Семенов, «Килбиэннээх үлэтин иһин» Саха сирин идэлээх сойуустарын федерациятын мэтээлинэнэн Покровкаттан Семен Артемьев, тыа хаһаайыстыбатын салалтатын Бочуоттаах Грамотатынан Абаҕаттан Алексей Романов, Бөтүҥтэн Алексей Иванов, тыа хаһаайыстыбатын салалтатын Махтал Суругунан Абаҕаттан Денис Еремеев бэлиэтэннилэр.


Күрэхтэһиигэ улуус 7 нэһилиэгиттэн 10 хамаанда кытынна. Күн бастакы аҥаарыгар тырахтарыыстар тимир көлөлөрүн төһө билэллэрин тургуттулар, онтон сатабылларын холостулар. Министиэристибэ уонна улуус исписэлиистэрэ тыа хаһаайыстыбатын министиэристибэтин департаменын

тутаах исписэлииһэ, кылаабынай судьуйа Николай Мярин салалтатынан кыттааччылары сыаналаатылар. Хамаанда бэриллэрин кытта идэлээх дьон сүүрүүнэн тыраахтырга олордулар, «гаражтан» бырысыаптарын холбонон таҕыстылар, батары анньыллыбыт ураҕастары эргийэ, эрийэ сүүртүлэр, бэрэбинэни ылан чууркаларга, уурдулар, төттөрү аҕалан оннугар ууран баран бырысыаптарын гаражка төттөрү анньан уктулар, итиэннэ бүтэһик түһүмэххэ бурдуктаах кууллары илиилэринэн таһан сааһылаатылар.


Түһүмэхтэри түргэнник уонна хаачыстыбалаахтык ааспыт Чакыртан Тимофей Семенов, Николай Тихонов, Мичил Пахомов састааптаах «Кэскил» хаһаайыстыба (дириэктэр Александр Карманов, биригэдьиир Семен Григорьев) бастакы,


Соморсунтан Виталий Тарабукин, Василий Тарабукин, Семен Борисов састааптаах Виталий Тарабукин бааһынай хаһаайыстыбаын хамаандата иккис, Соморсунтан Афанасий Караканов, Валерий Григорьев, Александр Оконешников састааптаах Алексей Караканов бааһынай хаһаайыстыбатын хамаандата үһүс миэстэ буоллулар уонна улуус дьаһалтатын RASER RC50-A Delta, Минск D4 125, Минск Х-250 матасыыкылларын хаһаайыннара буоллулар. Оттон «Саамай аҕа саастаах механизатор тырахтарыыс» аатын «Бөтүҥ» ТХПК-ттан 39 сыл ыстаастаах Константин Слепцов, «Саамай эдэр механизатор тырахтарыыс» аатын Сэргэ Бэстэн Айтал Фомин ыллылар.


Күрэхтэһиини комментатор Михаил Чупров сырдатан күрэхтэһии күүрээнин күүһүрдэн биэрдэ. Маны таһынан икки көрүҥҥэ күрэхтэһиилэр буоллулар. Мас тардыһыытыгар Сулҕаччыттан Максим Фомин, хапсаҕайга улуус салалтатыттан Олег Егоров кылаан кыайыылаахтарынан буоллулар уонна Соморсун нэһилиэгин харчынан сэртипикээттэрин хаһаайына буоллулар. Тэрээһин спонсордарынан тыа хаһаайыстыбатын министиэристибэтэ, «Россельхозцентр» тэрилтэ, өрөспүүбүлүкэ сири оҥорууга сулууспата, мелиорация сулууспата, тыа хаһаайыстыбатын улуустааҕы салалтата, улуус тэрээһинээх хаһаайыстыбалара, Соморсун нэһилиэгэ, биирдиилээн урбаанньыттар Руслан Федотов, Ньургун Гольдеров, Егор Ефимов, Хаҥалас Хачыкаатыттан үтүөлээх механизатор Роман Куприянов, Покровскайтан бааһынай хаһаайыстыба салайааччыта Евдокия Денисова онтон да атыттар буоллулар.

Николай Мярин, министиэристибэ тутаах исписэлииһэ, кылаабынай судьуйа:

«Механизатордар күрэхтэһиилэрэ улуус көҕүлээһининэн уонна балаһыанньатынан барда. Биһиги дьүүллүүр сүбэҕэ үлэлээн көмө буоллубут. Чурапчылар «Күүстээх көлө» диэн тырахтарыыстарга аналлаах аһаҕас күрэхтэһиини ыыталлар. Онно сүүһүнэн тыраахтар тэҥинэн мустан улахан күрэхтэһии буолбута. Оттон манна хамаандалар биир тыраахатарынан талбыт сэрэбиэйдэринэн уочаратынан тэҥ усулуобуйаҕа кииристилэр. Тимир көлөнү ыытааччылар үлэлэригэр-хамнастарыгар теорияны билиилэрэ эмиэ улахан суолталаах. Бу түһүмэх гостехнадзор ирдэбилинэн барда. Сүрүннээн тиэхиньикэни куттала суох туһаныы, ыытыы уонна тыраахтар тутулун, тэриллэрин, оҥоһугун билиини тургутуу буолла. Түмүктэр улахан араастаһыыта суох таҕыстылар, онон күрэхтэһии Амма улууһун механизатордара идэлэрин баһылаабыттарын, үрдүк таһымнаахтарын көрдөрдө».


Семен Григорьев, кыайыылаах тахсыбыт «Кэскил» хаһаайыстыба биригэдьиирэ:

«Билигин тыа хаһаайыстыбатын бары үлэтэ тырахтарыыстара суох сатаммат, табыллыбат буолла. Оттооһун барыта кинилэр күүстэринэн барар. Биһиги хаһаайыстыбабыт от ыйын 2 күнүттэн ходуһаҕа таҕыста. Дьараны оттоон бүтэрдибит, билигин Лэпсэй кытылыгар сылдьабыт, онтон Күбээйигэ, Покровкаҕа барыахпыт. От үүнүүтэ ааспыт сылтан ордук. Билигин 300-тэн тахса сууламмыт оту ыллыбыт. Бу сайын 1000 туоннаны оттуур былааннаахпыт. Сүөһү эбии аһылыгар 250 га күөх оту ыстыбыт. Манна кэлбит уолаттарбыт иккитэ суулуур, биирэ охсооччу, бэйэм охсобун, суулуубун. Бу күрэхтэһии тырахтарыыстар бэйэ-бэйэбитин билсэрбитигэр, уопут атастаһарбытыгар көмөлөһөр уонна күүстээх үлэҕэ көҕүлүүр».

Источник