Новости
Амма Наахараттан айан аргыстаах, суол доҕордоох Юрий Александров
2 мая 2021

Юрий Александров – Амма Наахара биир бастыҥ ыалын баһылыга. Өр сыл суоппарынан үлэлээн таһаҕас бөҕө таспыт үлэһит бэрдэ.

Ааспыт кэмнэргэ ыам ыйын 1 күнүгэр “Эйэ, үлэ, маай” бырааһынньыга бэлиэтэнэрэ. Билигин “Сааскы маай” бырааһынньыгар кубулуйдар даҕаны суолтатын сүтэрбэккэ, бу күн үлэһит дьоммут тустарынан кэпсиибит. Онон мин Амма Наахара нэһилиэгэр олорор, өр сыл суоппарынан үлэлээбит айан аргыстаах, суол доҕордоох Юрий Александрович Александров уонна кини дьиэ кэргэнин билиһиннэрэбин.

Юрий Александрович нэһилиэк биир бастыҥ ыалын баһылыга. 1974 сыллаахтан суоппардаабыт, үгүс сыратын сындалҕаннаах айаҥҥа анаабыт киһи. 40-ча сыл Саха сирин суолларынан уонунан тыһыынча килэмиэтири  айаннаан, дьону таһан, таһаҕас бөҕө тиэйэн сынньалаҥы билбэккэ үлэлээбитэ.

Урут даҕаны, билигин даҕаны көлөтө суох дойдубут экономиката да, дьон-сэргэ күннээҕи да олоҕо туруктаах буолар кыаҕа суоҕун таба өйдөөн, идэтин олус сөбүлээн түүннэри-күнүстэри кэлбитэ-барбыта.  Суоппар идэтигэр бэриниилээх киһи массыыната өрүү ыраас, айаҥҥа бэлэм буоларын ситиһэрэ, туруорбут былааннарын эрдэ толорон махтал суруктарынан, грамоталарынан,  «XII пятилетка ударнига» бэлиэнэн наҕараадаламмыта.

Юрий Александрович  нэһилиэк общественнай үлэтигэр эмиэ олус актыыбынайдык кыттара. Оччолорго табаарыстыы суукка бэрэссэдээтэлинэн, биир идэлээхтэр сойуустарыгар эмиэ үлэлээбитэ. Эдэр сылдьан волейболга нэһилиэк чиэһин күрэхтэргэ хаста да көмүскээбитэ.

Сындалҕаннаах айантан суоппары күннэтэ дьиэтигэр таптыыр кэргэнэ, оҕолоро кэтэһэллэрэ.  Түүннэри-күннэри айан суолугар атаарар аналлаах доҕоро Алдан кыыһа Валя, Валентина Семеновна оскуолаҕа нуучча тылын учууталынан үлэлиир.

Кыыстаах уол атахтарыгар турбут туспа ыаллар. Таптыыр сиэннэрдэнэн  Александровтар быр-бааччы олороллор. Дьиэ хаһаайката Валентина минньигэс астаах хаһаайка, оҕуруотчут мааныта. Кыыстара Светлана Юрьевна ийэтин курдук учуутал идэлээх. Уоллара Юрий аҕатын курдук тимир көлө доҕордоох, тигинэччи сүүрэр таксист бэрдэ.

Александровтар саха ыалын сиэринэн дьиэ кэргэнинэн сир аһын кыайа туталлар, бултууллар. Сайынын аймахтар, табаарыстар сөбүлээн мустар ыалдьытымсах ыаллара.

Юрий Александрович  65 сааспар үктэнним диэн олорунан кэбиспэт. Аныгы эһээ сонуну билээри хаһыаты ааҕан, массыынатын хасыһан уһун күн солото суох олорор. Дьиэ кэргэҥҥэ эрэллээх эркин курдук аҕаҕа, үлэ киһитигэр уонна кини дьиэ кэргэнигэр үгүс үтүөнү, кэрэттэн кэрэни баҕарыахха.

Суоппар дьоҥҥо эһиэхэ.
Суолгут көнө ньуурдаах буоллун.
Эрэй эҥээрдэспэтин.
Саахалга түбэспэккэ.
Сахсыллыбакка айаннааҥ.