Амма нэһилиэгин холбоһуктаах тэрилтэлэрин икки ардыларыгар биатлоҥҥа ыытыллыбыт күрэхтэһиигэ урбаанньыттар хамаандалара чөмпүйүөн буолла. Бу хамаанда биатлонистара төрдүс сылын ыытыллар күрэхтэһиигэ төрдүс төгүлүн мэтээллэри кэттилэр.

Амма нэһилиэгин холбоһуктаах тэрилтэлэрин спортсменнара спартакиада иһинэн ыытыллар үгэс буолбут биатлоҥҥа күрэхтэстилэр.

Хайыһар суолугар оҕо спордун оскуолата, ОДьКХ, Амма 1 N –дээх орто оскуолата, «Автодор» РИК, нэһилиэк дьаһалтата, эдэр туристар станциялара, урбаанньыттар, «Амма – Суол» тэрилтэтэ, улуустааҕы кииннэммит балыыһа хамаандалара таҕыстылар. Ирдэбил быһыытынан хамаандаҕа 2 эдэр, 2 бэтэрээн спортсменнар 700 миэтэрэлээх дистанцияҕа сүүрдүлэр, 10 миэтэрэ ыраахха баар сыалы ыттылар.

Күрэхтэһиини кылаабынай судьуйа Иван Зедгенидзев, сэкирэтээр Давид Федоров салайан ыыттылар. Тыҥааһыннаах күрэхтэһиилэр түмүктэринэн кылбар кыайыыны урбаанньыттар Иван Заровняев, Надежда Гаврильева, Василий Софронов, Валентина Алексеева ситистилэр.

Иккис миэстэҕэ нэһилиэк дьаһалтатын чиэһин көмүскээбит Тимур Константинов, Лия Филатова, Александр Попов, Мария Гаврильева уонна ОДьКХ иһинэн киирэр тэрилтэлэртэн Гаврил Макаров, Ньургуяна Строева, Александр Цветков, Алтана Артемьева үһүс үктэлгэ таҕыстылар.

Күн-дьыл туран биэрэн, көрөөччү дьон, оҕо аймах спорт бырааһынньыгар кэлэн күрэхтэһиини астына көрдүлэр.

«Нэһилиэкккэ аан бастаан ыытыллыбыт биатлон күрэхтэһиитигэр бастакы, онтон иккис сылга иккис, үһүс сылга үһүс буолбуппут. Ааспыт сылга ыарыынан ситимнээн күрэхтэһии буолбатаҕа. Быйыл эмиэ бастакы миэстэ буоламмыт үөрүүбүт улахан. Оскуолаҕа үөрэнэр эрдэхпинэ физкультураҕа учууталым Николай Герасимович Гурьев эрчийэн улуус чөмпүйүөнэ буолбутум. Ол кэмнэргэ классическай истиилинэн хайыһардыырбыт. Билигин кэргэним сүбэтинэн иккис сылбын хаҥкылааһын ньыматыгар үөрэнэ сылдьабын. Иккиэн олунньу ыйтан хайыһар суолугар тахсыбыппыт. Кэргэним хайыһардьыт, сүүрүк, тустуук, ориентированиеҕа СГУ биэс төгүллээх чөмпүйүөнэ. Ол иһин кини көҕүлээһининэн уһун олоруу, хааччахтааһын кэмигэр дьыл кэмнэринэн көрөн саҥа спорт саалатыгар, манежка куруук сылдьабыт, Арҕаа Дэриэбинэ сыырыгар тахсан, түһэн эрчиллэбит. Хайыһарга Иван Заровняев, Лариса Никифорова, Саргылана Тимофеева буоламмыт бэһиэн дьарыктанабыт. Хамаандабытыгар сүүрбүт Надежда Гаврильева тренер Анатолий Афанасьевич Артемьев иитиллээччитэ буолан үчүгэйдик сүүрдэ. Туйахтаах кыылларга туртаска, куска бултуур көҥүллээхпин. Бултуур, балыктыыр буоламмын араас усулуобуйаҕа сылдьарым тулуур өттүнэн эмиэ улахан туһалаах. Биатлоҥҥа ити дьарыгым эмиэ көмөлөһөр. Спордунан ханнык баҕарар саастаах киһи ханнык баҕарар көрүҥнэринэн дьарыктаныан, саҥа ньымалары үөрэнэн баһылыан сөп эбит диэн толкуйдаахпын. Нэһилиэгим олохтоохторун баар усулобуйаны туһанан спорт саалаларыгар, стадиоҥҥа, манежка, айылҕаҕа сылдьан доруобуйаларын көрүнэллэригэр, дьарыктаналларыгар, араас күрэхтэһиилэргэ кытталларыгар ыҥырабын», – диэн этэр кыайыылаах хамаанда бэтэрээн хайыһардьыта, бэргэн ытааччыта Валентина Алексеева.

Источник: https://ulus.media/2021/03/27/amma-ne-ilieger-biatlo-a-urbaannyttar-kyajdylar/