Новости
Амма нэһилиэгин олохтоохторо түөлбэлэрэ ыраас туруктаах буоларыгар баҕалара улахан
27 июля 2021

Амма нэһилиэгин уулуссалара, тиэргэннэрэ ыраас буолалларыгар түөлбэлэр олохтоохторо уонна эдэр урбаанньыт Василий Боярскай улахан көмө буолаллар. Сайын саамай үгэннээн турар ыйдарыгар олохтоохтор, ыалдьыттар эмиэ нэһилиэги киртиппэттэригэр, кэрэ айылҕаны харыстыылларыгар ыҥыраллар. «Ыам ыйын 17 күнүттэн нэһилиэкпит ыалларын тиэргэннэриттэн дьиэ иһиттэн тахсар бөҕү хомуйан саҕалаабытым. Маҥнайгы ыйга босхо тиэйбитим. Билиҥҥи туругунан биһиги өҥөбүтүнэн 4 тыһыынча кэриҥэ киһи туһанар. Дьон үс ый иһигэр үөрэнэн биһиги тиийэр күммүтүгэр сарсыарда эрдэ 9 чаас иннигэр бөхтөрүн киирэр ааннарыгар бэлэмнээн уурар буоллулар. 8 кубтаах ГАЗ – 3309 бөҕү тиэйэр анал тиэхиньикэбитинэн Вячеслав уонна Тимур Дьячковскайдары кытта былаан быһыытынан уулуссалары кэрийэн табыллан үлэлии сылдьабыт, сыбаалкаҕа күҥҥэ биэстэ кырынабыт. Олохтоохтор балаһыанньаны, ирдэбиллэри өйдөөннөр, үөрэнэннэр, бөхтөрүн тиэйиини төлөөн эрэллэрэ үөрдэр.

Инники өттүгэр ити сууматтан ыаллары үс ыйга биирдэ анал мөһөөччүктэринэн хааччыйар баҕалаахпын. Барыта кыаллан истэҕинэ чугастааҕы Чапчылҕан, Бөтүҥ, Абаҕа нэһилиэктэриттэн бөҕү тиэйэр былааннаахпын. «Алаас», «Саһарҕа», «Хардыы», «Муона» курдук, уопсайынан, нэһилиэк түөлбэлэрин барыларын кытта ыкса үлэлэһэбин.

Олохтоохтор уулуссалара ыраас буоларыгар улахан баҕалаахтар, баҕа өттүлэринэн араас хабааннаах субуотунньуктары ыыталлар. Ол иһин кинилэр биһиэхэ куруук көмө буолалларыгар улахан махталлаахпын. Онон олохтоохтору тапталлаах нэһилиэкпит, кэрэ айылҕабыт ыраас буоларыгар, ыалдьыттарбыт эмиэ ити курдук сыһыаннаһалларыгар, үүнэр ыччаппытыгар бэйэбитинэн холобур буоларбытыгар, кинилэргэ сирбитин-уоппутун чөл туруктаах хаалларарбытыгар ыҥырабын», — диэн этэр урбаанньыт Василий Боярскай.

Сиһилии: https://xn--80aaaambpp4b1d.xn--p1ai/article/18359