Новости
Амма Соморсунугар фермер Алексей Караканов хаһаайыстыбатын салгыы сайыннарыаҕа
21 сентября 2021

Амма Соморсунугар сылгыны иитиинэн дьарыктанар хаһаайыстыба салайааччыта Алексей Караканов «Дьиэ кэргэн ферматын» сайыннарыыга туһуламмыт грант кыайыылааҕынан ааттанна. Манна 14 улуустан барыта 33 сайаапка түспүтүттэн 19 бааһынай хаһаайыстыба салайааччылара хапсаннар хаһаайыстыбаларын салгыы сайыннарыахтара.

«Эрдэттэн былааннанан олохтоохтук оҥостон үлэлиэм диэн аан маҥнай 2014 сылтан саҕалаан сылгыны иитэр хаһаайыстыбабын тэриммитим. 2016 сыллаахха «Саҕалааччы фермер» буоламмын 1,5 мөлүйүөн сууммаҕа сылгы базатын туттубутум,  сылгы атыыласпытым. Бастаан сүүрбэччэ төбөлөөх буоллахпына, биэс сыл иһигэр сүүсчэкэ төбөҕө тириэртим. Ол иһигэр 60 төбө төрүөх буолар сылгылар. Төрүөх буолар сылгыбын аны 120 төбөҕө тирэрдэр баҕалаахпын. Билигин сүрүннээн I Чакырга базаланан үлэлиибин. Икки үлэһиттээхпин. Нэһилиэктэн 50 км сиргэ баар үрэххэ биир бастыҥ базаны туттар уонна тиэхинькэ, сылгы атыылаһар былааннаахпын. Быйыл 400 туонна оту бэлэмнээтим. Кыстыкпыт этэҥҥэ ааста, төрүөх да куһаҕана суох. Сылгыларым оннуларын буллахтарына, аны сүөһү иитиитинэн эмиэ дьарыктанар санаалаахпын», — диэн этэр фермер Алексей Караканов.

Источник