Новости
Амма урбаанньыттара амарах сүрэхтэрин иһин анал бэлиэнэн биһирэннилэр
9 июня 2021

Амма улууһугар социальнай үлэһит күнэ кэрэ бэлиэ түгэннээх буолла. Куруутун күүс-көмө, өйөбүл буолар урбаанньыттар “За милосердие” диэн Бүтүн Арассыыйатааҕы бэлиэнэн наҕараадаланнылар.

“Бу бэлиэни социальнай педагогтар уонна социальнай үлэһиттэр Сойуустара диэн Бүтүн Арассыыйатааҕы уопсастыбаннай тэрилтэ олохтообута. Сойуус бу бэлиэни саастаах аҕам дьоҥҥо, инбэлииттэргэ, кыамматтарга, оҕолорго  болҕомтолоох, ханнык баҕарар социальнай хайысхалаах тэрээһиннэргэ көмөлөһөр, көхтөөхтүк онно кыттар дьоҥҥо аныыр.

Биһиги отделениебыт бу бэлиэни бэйэбит попечителлэрбитигэр, биһиги ыытар үлэбитигэр бары өттүнэн куруутун өйүүр дьоммутугар, үтүө санаалаах урбаанньыттарбытыгар Людмила Еремеевна Куприяноваҕа, Наталья Ивановна Шишигинаҕа, Альбина Александровна Аммосоваҕа уонна Иван Васильевич Заровняевка үөрэн-көтөн туран туттардыбыт. Чахчы да кинилэр бу наҕарааданы ылаллара саамай сөптөөх диэн саныыбыт. Хас да сыл усталарыгар сылаас сүрэхтэрин оҕолорго, көмөҕө наадыйар дьиэ кэргэҥҥэ биэрэн кэлбиттэрэ үрдүктүк сыаналаммытыттан истиҥник үөрэн туран эҕэрдэлиибит уонна өссө төгүл оҥорор көмөҕүт иһин махталбытын тириэрдэбит”, — диэн этэр Амма улууһун социальнай управлениетын иһинэн баар дьиэ кэргэҥҥэ уонна оҕолорго социальнай көмөнү оҥорор отделение сэбиэдиссэйэ Надежда Сергиенко.

Чахчы да маннык уйан сүрэхтээх, ыраас дууһалаах , кыһалҕаны өйдүүр дьон баар буолан  олохпут бары ыараханнара чэпчииллэр.