Сэтинньи 12-тэ Амма улууһун урбааныгар биир сонун күнүнэн буолла. Эдэр урбаанньыт дьиэ кэргэн Анна уонна Эдуард Ивановтар саҥа бырайыактарын хамыыһыйа иннигэр сүрэхтээтилэр. Амма маҕаһыыннарын салайааччылара Людмила Куприянова, Альбина Аммосова, Анна Брызгаева, Георгий Васильев, «Бизнес инкубатор» салайааччыта Евгений Афанасьев, «Мой бизнес» Амма улууска салайааччыта Владимир Колосов саҥа, сонун уруһуйдуур набордар атыылаһааччылар сэҥээриилэрин ылыахтара диэн көрөн, истэн итэҕэйдилэр.

«Кустук» диэн ааттаммыт улахан кээмэйдээх кырааскалар 3-10 саастаах оҕолорго анаммыттар. Набордар икки кээмэйдээхтэр: бэлэххэ анаммыт А0 (80х100 см.), оттон маҕаһыыннарга атыыга тахсар А1 (ватман саҕа).

— «Уһуйаан, оскуола оҕолоро билигин ыраахтан олорон үөрэххэ көһөннөр гаджет тутан баран олороллоро кистэл буолбатах. Ол иһин оҕо иллэҥ кэмин туһалаахтык атаарарыгар анаан маннык улахан кээмэйдээх кырааскалыыр набордары оҥорорго ылыстыбыт. «Кустук» бырайыак оҕо моторикатын сайыннарар, дьүһүн дьүөрэлэһиитин араарар буолар, кэрэҕэ тардыһыыта күүһүрэр. Итиэннэ сорох уруһуйдар сахалыы остуоруйалартан ылыллыбыт буоланнар кырачааннары саха литературатыгар уһуйуу тэҥинэн ыытыллар», — диэн бырайыак ааптара, «Арт фэмили» устуудьуйа салайааччыта Эдуард Николаевич сиһилии быһаарар.

Полиграфия эйгэтигэр элбэх сонун бырайыактардаах дьиэ кэргэн саҥа сүүрээннэрэ нэһилиэнньэҕэ, атыылаһааччыларга киэҥ сэҥээриини ылыа диэн эрэнэбит.

Елена Александрова,

газета «Амма оло5о»

Владимир Колосов,

заведующий обособленным подразделением ГАУ РС(Я) Центр «Мой бизнес» в Амгинском улусе