«Амма» ТХПК соҕотуопкалыыр, астыыр – үөллүүр киин икки ый анараа өттүгэр «Амма уута» уу пуунун арыйан үлэлэтэр. Олохтоохтор уонна үгүс ыалдьыттар иһэр ууларын удамыр сыанаҕа мантан кэлэн ылаллара, бэйэлэрин иһиттэригэр куттаран илдьэ бараллара даҕаны табыгастаах буолла.

Айысен Черноградскай дириэктэрдээх «Амма» ТХПК соҕотуопкалыыр, астыыр – үөллүүр киин Чапчылҕаннааҕы ууну ыраастыыр комплексыгар дьон сылдьара көҥүллэммэтинэн «Амма уута» уу пуунун улуус киинигэр арыйан үлэлэтэр.

Билигин нэһилиэнньэ сэттэ төгүл ыраастаммыт ууну удамыр сыанаҕа мантан кэлэн ылар. Дьаҥынан ситимнээн, куйаас күннэр турбуттарынан уонна сайын өрүс уута киртийэринэн даҕаны дьон иһэр ууларын бэйэлэрин иһиттэригэр куттаран да ылалларыгар табыгастаах буолла. Биир өттүнэн үс киһи үлэлиир миэстэтэ эбиллэн биэрбитэ тыа сирин дьонугар улахан көмө буолар.

Манна сэбиэдиссэйинэн СӨ тыатын хаһаайыстыбатын туйгуна, СӨ эргиэнин, бочуоттаах үлэһитэ, Амма нэһилиэгин бочуоттаах олохтооҕо Зинаида Бродникова, операторынан Иван Пастухов, оробуочайынан Иннокентий Яковлев күнү быһа дьон туһугар үлэлииллэр.

«Куйаас күннэр тураннар олохтоохтор уонна үгүс ыалдьыттарбыт сарсыарда 9 чаастан саҕалаан киэһэ 7 чааска диэри тохтоло суох биһиэхэ кэлэ тураллар. Бу курдук икки ый устата үлэлээтибит. Уубут дьон баҕатынан араас кээмэйдээх иһиттэргэ атыыланар. 5 иһиттэн элбэҕи ылбыттар чэпчэтиллибит сыананан туһаналлар. Нэһилиэнньэ күҥҥэ 20 лиитэрэлээх 200 – 300 иһити аҕалан атастаһар. Салалтабыт бу пууммутун өссө ситэрэн, оҥорон кыһыннары үлэлэтэр былааннаах», – диэн үөрэ-көтө кэпсиир сэбиэдиссэй Зинаида Бродникова.

Автор Алтана Артемьева

Источник: ЭСМИ «Ulus.media»