Новости "Центра "Мой бизнес"
Амматааҕы «Мин биисинэһим» киин нэһилиэнньэ наадыйыытынан үлэлиир
25 февраля 2021

«Мин биисинэһим» киин бэйэтин үлэтин нэһилиэнньэ наадыйыытынан ыытар. Бу күннэргэ оҕуруот аһын, үүнээйини олордор кэм саҕаламмытынан нэһилиэктэргэ маныаха туһааннаах атыыны тэрийэр.

«Мин биисинэһим» киин үлэтин нэһилиэктэр, тыа сирин олохтоохторо сэҥээрэннэр бэйэ дьыалатын арынааччылар, бу тэрилтэ ыытар үлэтин туһанааччылар да күннэтэ элбээн иһэллэр. Холобур, соторутааҕыта Сатаҕай нэһилиэгин олохтооҕо Гаврил Орлов нэһилиэккэ иһэр уу боппуруоһа турарынан бэйэтин дьыалатын саҕалаата. Кини «Саха фильтр» хааччахтаммыт эппиэтинэстээх тэрилтэ үлэһиттэрин кытары билсэн, сөбүлэҥ түһэрсэн, Сатаҕайга кэлэннэр тэриллэрин таҥан, туруоран биэрдилэр, онон олохтоохтор ыраас ууну туһанар кыахтаннылар.

Аны улууска биллэриллибит ыал экономикатын сылын иитинэн улуус дьаһалтата, «Мин биисинэһим» киин, биисинэс инкубатор көҕүлээннэр, Амматтан «Утум», «Комфорт» маҕаһыыннар уонна чааһынай урбаанньыттар көмөлөрүнэн нэһилиэктэринэн атыы-эргиэн дьаарбаҥката тэриллэр. Сарсын бөлөх Болугур, Өнньүөс хайысхатынан барыаҕа.

Владимир Колосов  «Мин биисинэһим» Амматааҕы салаатын салайааччыта: «Ыал экономикатын сылынан ситимнээн бастакы ыытыллар хамсааһыммытын тиэхиньикэнэн өйөөбүт Амма 1N-дээх уонна 2N-дээх оскуолаларын, Сулҕаччы, Сэргэ Бэс, Соморсун, Мээндиги, Абаҕа нэһилиэктэрин салалталарыгар, урбаанньыттарбытыгар нэһилиэнньэ туһугар сыаналарын сөбүгэр көрөн түһэрэн атыылыылларыгар махталбытын тириэрдэбит. Хас биирдии киһи барыта Аммаҕа кэлэн наадалааҕын атыыласпат, ол иһин олохтоохтор наадыйыыларынан, кинилэр сайаапкаларынан урбаанньыттарбыт көмөлөрүнэн атыыны хас биирдии нэһилиэккэ тэрийиэхпит. Сотору каркастаах теплицалары таһаарыахпыт, улуус дьаһалтата кууруссаны, сибиинньэ оҕотун, моонньоҕон, яблоня уктарын атыылыыры былаанныыр».

Ия Григорьева, урбаанньыт, «Цветы» киоск хаһаайката: «Оҕуруот аһын, үүнээйини олордор кэмнэри учуоттаан сиэмэ, буор, уоҕурдуу, онуоха туттуллар тэриллэри таһаарбыппытын тыа дьоно хамаҕатык атыыластылар. Үөрбүттэрин биллэрдилэр, махталларын эттилэр, өссө ыҥырдылар, сайаапкаларын биэрдилэр. Нэһилиэк аайы эрдэ биллэрии тиийэн элбэх киһи сырытта. Атыылыыр миэстэбитин эрдэ бэлэмнээбит буоланнар, туох да кэтэһиитэ-манаһыыта суох лоп-бааччы барыта кэмигэр ыытылынна, онон барыбытыгар табыгастаах буолбутугар тэрийээччилэргэ улахан махталбын этэбин».

 

Ааптар: Алтана Артемьева

Подробнее: https://ulus.media/2021/02/24/ammataa-y-min-biisine-im-kiin-ne-ilienne-naadyjyytynan-leliir/