«Мин Уус Маайа Күп нэһилиэгиттэн төрүттээх эһэм Дмитрий Нестерович эбэҥки норуотун поэта, прозаига, худуоһунньуга буолар. Аҕам Андрей Дмитриевич эмиэ худуоһунньук идэлээх, хоһоонньут. 2006 сыллаахха Нерюнгрига Иенгратааҕы хотугу норуоттар тылларын үөрэтэр оскуола интэринээккэ үс сыл Клавдия Иннокентьевна Макароваҕа үөрэнэммин төрүт тылбын, эбэҥки тылын билсибитим. Маҥнай үөрэтэргэ ыарахан этэ. Кэлин уонча сыл устата кэпсэтэр эйгэм суох буолан тылбын умна быһыытыйбытым. Ол иһин тылбын сөргүтэр сыаллаах «Ayana» түргэн сыһыарыыны бэлэмнээбитим. Бу сыһыарыы нууччалыыттан эбэҥкилии тылбаастыыр эрэ буолбакка, эбэҥкилии ырыаны холбуур, хартыыналары, видео устууну көрдөрөр улахан медиа платформа. «Алиса» саҥарар көмөлөһөөччү курдук, искусственнай өйүнэн үлэлиир буолан эйигин кытта киһи курдук кэпсэтиэн сөп. Эбэҥки, саха тылларын боруобалаан саҥа чинчийиилэри оҥордубут. Маннык үлэ элбэх бириэмэни, үбү-харчыны ирдиир.
«Ayana»-ҕа туттубут ньымабытын ханнык баҕарар кириллицанан туттуллар тылларга туһаныахха сөп. Саха тылыгар робот сахалыы дорҕооннору саҥарарыгар ыарахан соҕус буолуон сөп да туох барыта табыллыан сөп. Арассыыйа инновацияҕа, сибээскэ министиэристэбэтэ ыытар маннык хайысхаларыгар, граннарга кытта сатыыбын. Ол харчы, наҕараада туһугар буолбакка, билигин тылбыт, култуурабыт тыыннаах хааларыгар билиҥҥи эдэр көлүөнэ улахан эппиэтинэспит буолар. Ити кыһалҕаны аныгы технологиялар көмөлөрүнэн быһаарыахха сөп дии саныыбын. Үгэс буолбут урукку ньымалар кыахтара кыччаата. Түргэн сыһыарыы хаһан баҕарар холбонор, ханна баҕарар баар, аан дойдуга киэҥник тарҕанна. Бу сыһыарыыны мин соҕотоҕун оҥорботоҕум. Миэхэ көмө буолар элбэх дьоннородоохпун. Ол курдук Владимир Черноградскай салайааччылаах Арктика сайдыытыгар уонна хотугу норуоттар дьыаларыгар министиэристибэтэ 500 тыһыынчалаах гранынан, Матвей Евсеев салайааччылаах «Арктик Капитал», Екатерина Сокольникова салайааччылаах «Алагун» Эдьигээн национальнай эбэҥки оройуонун уопсастыбаннай тэрилтэлэрэ үбүнэн көмө буолбуттарыгар махталым улахан», — диэн санаатын үллэстэр ааптар Николай Апросимов.
