Новости
Атамайдар о5олорун урбаан эйгэтигэр сыhыараллар
30 января 2019

В.Д.Лонгинов аатынан Атамай орто оскуолатыгар оҕо оскуола сааһыттан эбии дохуот киллэринэ, урбаан эйгэтигэр сыста үөрэнэригэр улахан болҕомто ууруллар. Ол  түмүгүнэн, IX кылаас үөрэнээччитэ  Дайаана Колесова өрөспүүбүлүкэтээҕи урбаан олимпиадатыгар кыттан,  «Урбаан — тыа сиригэр» номинацияҕа II миэстэни ылары ситистэ.

Атамай орто оскуолатыгар оҕо оскуола сааһыттан эбии дохуот киллэринэригэр, эппиэтинэстээх, айар-тутар, оҥорон таһаарар кыаҕын сайыннарар сыаллаах кылаастар икки ардыларыгар бизнес-бырайыак көмүскээһинин күрэһэ сыллата ыытыллар. Оҕолор бырайыагы хайдах суруйарга, харчыны сатаан суоттуурга, сөпкө туттарга үөрэнэллэр. Билигин оҕолор тугу сатыылларынан дьарыктанан эрэллэр. Дьыалаларын сайыннарарга эбии араас күрэстэргэ, оонньууларга көхтөөхтүк кытталлар.

Спартак Ефремов, Марк Васильев, Дайаана Колесова уонна Юлиана Васильева өрөспүүбүлүкэтээҕи урбаан олимпиадатыгар икки тууру ааһан, финалга ыҥырыллан ситиһиилээхтик кыттан кэллилэр. Финал түмүгүнэн, IX кылаас үөрэнээччитэ Дайаана Колесова «Урбаан — тыа сиригэр» номинацияҕа II миэстэни ылары ситистэ.

Ааптар: Дария Сидорова.