Бөтүҥ дьахталларын Сэбиэтэ улууска биир көхтөөх үлэлээх Сэбиэтинэн биллэр. Сэбиэт чилиэннэрэ нэһилиэккэ араас тэрээһиннэри ыыталлар, бары ыытыллар үлэҕэ күүс-көмө буолаллар. Быйыл улууска Дьиэ кэргэн экономикатын сыла биллэриллэн, ураты болҕомтолорун бэйэ хаһаайыстыбалаах буоларыгар уураллар. Бу күннэргэ бааһынай хаһаайыстыбалары кытта кэпсэтэн элбэх оҕолоох ыаллар хортуоппуй олордон аны күһүн хортуоскалаах буолууларыгар үлэлэстилэр. Ол курдук, Терентий Сутаков баһылыктаах бааһынай хаһаайыстыба ыалларга хортуоппуй сирин уларсан, ону эдэр урбаанньыт Семен Степанов босхо хорутан биэрдэ. Онон бэлэм оҥоһуллубут бааһынаҕа көхтөөх үлэ ньиргийдэ.
“Барыта 10 ыалга сир уларсылынна. Биһиги бу Дьиэ кэргэн сылынан ыытар үлэбитигэр күүс-көмө буолбут, этиибитин ылыммыт дьоммутугар улахан махталбытын тириэрдэбит. Инникитин да күүс-көмө буола туруохтара диэн эрэнэбит”, — диэн этэр нэһилиэк дьахталларын Сэбиэтин бэрэсэдээтэлэ Татьяна Сутакова.
