Сэтинньи 24 күнүгэр Эдьигээн оройуонун дьаһалтатыттан Тыа хаһаайыстыбатын управлениятын салайааччы Охлопков Томмот Андреевич, Ветеринарнай управленияттан сэбиэдиссэй Неустроев Эрсан Александрович, ветеринар Андреев Петр Сергеевич, «Баахынай» община салайааччыта Иванов Николай Афанасьевич үс «Буран» көлөнөн, икки суукка кэриҥэ айаннаан Тарымнаах диэн табаны харааллааһын сиригэр айаннаан тиийбиттэр.
-240 километр кэриҥэ тэйиччи сытар табаны харааллыыр сиргэ, төһө да тымныы күннэр турдаллар, этэҥҥэ айаннаан тиийдибит. Биһиги тиийэрбитигэр номнуо «Баахынай» общинатын ыстаадын үлэһиттэрэ табаларын үүрэн аҕалан бэлэм олороллор этэ. Манна ыстаада биригэдьииринэн уопуттаах табаһыт Михайлов Николай Викторович үлэлии-хамныы сылдьар. Кинилиин сэргэ 6 табаһыт, өбүгэлэрин төрүт дьарыктарын ыһыктыбакка, бэриниилээхтик үлэлии сылдьаллар –Колтовской Федор, Сивцев Валентин, Иванов Борис, Иванов Григорий, Аполлонов Андрей, Христофоров Владимир. Ыстаада Тарымнаах үрэх баһыгар сайылаан билигин салгыы кыстыыр сиригэр айаннаары бэлэмнэнэ хааллылар. Тиийэн нэдиэлэ устата табаларбытын аахтыбыт, ол түмүгүнэн ыстаадаҕа 763 төбө баара билиннэ. Онтон ветеринардар табалартан хаан ыллылар, вакцина туруордулар, уопсай туруктарын көрдүлэр. Табалар, тугуттар көрүҥнэрэ, доруобуйалара этэҥҥэ буолан биэрдэ. Онон сыалбытын-сорукпутун ситиһэн ахсынньы 4 күнүгэр Эдьигээни буллубут. Аны «Тугут», салайааччы Винокурова Антонина Николаевна, «Мэйээн» салайааччы Шадрин Спиридон Спиридонович общиналарын ыстаадаларыгар айан былааҥҥа турар, — диэн кэпсээтэ Томмот Андреевич.
