«Аан дойду үрдүнэн бүрүкээбит хамсык ыарыы олохпут бары эйгэтигэр улаханнык оҕуста, ол да быһыытынан, кэтэх хаһаайыстыбалары тутан олорор дьон үлэтин эмиэ атахтаата. Урукку өттүгэр оҕуруот аһын хомуйууга оскуола оҕолоро, олохтоохтор күргүөмүнэн тахсан, хамнас аахсаллара хаһаайыстыба үлэтигэр эмиэ көмөлөөх буолара. Билигин хааччахтааһын кэмигэр бытаарыы таҕыста», – диэн улуус кылаабынай агронома Прокопий Белолюбскай баар кыһалҕаны билиһиннэрэн саҕалаата.
Салгыы:
– Маны тэҥэ сүрүн боппуруос – бородууксуйаны батарыы үлэтигэр улууска, өрөспүүбүлүкэҕэ тэриллэр улахан атыы дьаарбаҥкалара, дьон-сэргэ тоҕуоруһа мустан, биир сиртэн кыһыҥҥы хаһаастарын булуналлара тэриллибэт буолла. Бу, биллэн турар, хаһаайыстыбалар үлэлэригэр бытаарыыны, охсууну таһаарда.
Маныаха СӨ Тыатын хаһаайыстыбатын министиэристибэтэ оҥорон таһаарар бородууксуйаны батарыыга субсидияны көрөн, улууспут иһинэн “Мүрү-Агро” ТХПК тэриллэн, салайааччынан Айуран Березкин ананан, кэлэр сылтан дьыала, докумуон өттө ситэн, үлэлиэҕэ.
Оччотугар хаһаайыстыбалар да бородууксуйаларын батарыыга көмө буолуо итиэннэ чааһынай дьоҥҥо атыыны да тэрийии көдьүүстээхтик барыаҕа.
Хаартыскаларга: Суотту нэһилиэгэр Алексей Васильев ИП “Васильев” оҕуруот аһын үүннэриинэн дьарыктанар хаһаайыстыбата.