Новости
Биир дойдулаахпыт Дьокуускай саамай эдэр ресторатора
2 декабря 2021

Билсиҥ: Дьокуускай куорат саамай эдэр ресторатора, биһиги биир дойдулаахпыт, “Китай Город” салаайааччыта Надежда Павлова.

– 2010 с. Бэрдьигэстээх орто оскуолатын бүтэрбитим. 2014 с. ХИФУ экономическай интитутугар “Менеджмент организации” салаатыгар үөрэммитим. Идэбинэн урбаан эйгэтигэр үлэлээбитим үс сыл буолла. Үлэбин аан бастаан куоракка Сынньалаҥ пааркатыгар киоска арыйан саҕалаабытым. Билигин да сайыҥҥы кэмҥэ үлэлиир. Үөрэхпин бүтэртэхпиттэн атыы-эргиэн эйгэтигэр өҥө оҥоруутугар, араас бырайыактарга үлэлээбитим. Фотограф быһыытынан эмиэ үлэлээбитим, онно дьоҥҥо дьиэлэриэгр тиийэн, уобрастарын толкуйдаан, араас фотосессиялары оҥорорум.

2019 с. Сынньалаҥ пааркатыгар сайыҥҥы кэмҥэ фуд-кортка саҥа аныгылыы корнер киоскатын арыйбытым. Онтон сиэттэрэн сылы эргиччи үлэлиир кафе арыйыахха наада эбит диэн толкуйга кэлбиппит. Үлэбит хайысхатын сайыннарар сыалтан Москваҕа ресторатор идэтигэр үөрэммитим. “Старый Городка” 30 кв м. иэннээх хоско “Китай Город” диэн кыра кафе арыйбыппыт. Бу бырайыагы олоххо киллэриигэ Григорий Аксаментов, Мария Егорова уонна мин буолан үлэлэспиппит. Биһиги Григорийдыын рестораны салайабыт, Мария Егорова стратегическай партнербут буолар. Ону таһынан, управляющай, шеф повар, су шеф, бар-менеджера, сервис- менеджер, администратордар, технолог буолан бары биир хамаанданан үлэлиибит.

Сыл аҥаара үлэлээбиппит кэннэ пандемия буолан, от ыйыгар үлэбит тохтоон хаалбыта. Урбаанньыттарга төһө да ыарахан кэм буоллар санаабытын түһэрбэккэ, бэйэ-бэйэбитин өйөһөн өссө күүскэ үлэлээбиппит. Аһы дьиэҕэ тириэрдэр өҥөҕө көһөн, кылгас кэм иһигэр 5 киһилээх, хамаандабыт 15 буолбута.

2020 с. үлэбит миэстэтин кэҥэттэн, билигин 20 тахса үлэһиттээхпит. Рестораммыт Китай, Корея, Япония омук бүлүүдэлэрин астаан кылгас кэм иһигэр дьон сөбүлээн сылдьар биир ураты сиринэн буолла. Бэйэм маркетолог буоламмын, тэрилтэ үлэтин сайыннарар туһугар санаабын ууран туран үөрэ-көтө үлэлиибин.

Бэйэ дьыалатын арыныан баҕалаах ыччакка үлэни таптааҥ, ыарахантан толлумаҥ диэн сүбэлиэм этэ. Киһи ыарахаттары туораатаҕына эрэ сайдар. Бэйэҕитигэр сыал туруора уонна ону хайаан да ситиһэ үөрэниҥ, эдэр сааскытын мүлчү тутумаҥ. Дойдубут сайдыытын туһугар, кэрэҕэ талаһан, үлэлиэҕиҥ-хамсыаҕыҥ диэн ыҥырабын.

Источник