Новости
Бытантай урбаанньыттара Ил Дархан Туһаайыытын өйүүллэр
17 января 2019

Саха Өрөспүүбүлүкэтин баһылыга Айсен Николаев туһаайан этиитигэр дьоҕус бизнес көҥүл тыыннанарын бэлиэтээбитэ. Маннык өйөөһүнү саамай сөптөөх этии дии саныыр хоту сир урбаанньыта Валентина Андросова:

Хоту улууска урбаанынан дьарыктанар олус ыарахан, манна суол-иис уустуга охсор, аны өссө эбии административнай ирдэбиллэр, болдьохтор, хонтуруоллар хайдах да хорсун санаалаах киһи илиитин-атаҕын баайыах курдук балаһыанньаны үөскэтэллэр. Ол иһин, ыраах хоту чахчы баҕалаах, сыалын сымыһаҕын быһа ытыран баран ситиһиэм эрэ диир киһи урбаанынан дьарыктанар уонна бу эйгэҕэ иҥнэн хаалар. Дьиҥэ, ыччат үөрэнэр, бэйэтин дьыалатын арыныан баҕарар, ол эрэн, аҥардас судаарыстыба, сокуон өттүттэн кытаанах ирдэбиллэртэн, кэтэбилгэ сылдьарыттан толлор.

— Айсен Сергеевич, дьоҕус урбаан сайдыылаах, аныгы тыыннаах буоларын ситиһэргэ былаас бары таһымнара, муниципалитеттан саҕалаан кыттыһаллара, болҕойоллоро наадалаах диэн этэрэ олус сөптөөх. Тыа сирин урбааныгар киэҥ эйгэни хабарыгар тыын биэрэр, бэйэ оҥорон таһаарыытын сайыннарыы дьон олоҕун уйгутун тупсарыы буолар. Онон, өрөспүүбүлүкэ баһылыга урбааны өйүөххэ, манна үөскээбит балаһыанньаны төрдүттэн уларытыахха болдьосто диэн санаата биһиэхэ эрэли үөскэтэр, салгыы сайдарга кынат анньар. Былаас маннык быһаарыныыта мындыр толкуй, инникигэ олук буолар. Биһиги, хоту сир урбаанньыттара Айсен Сергеевич туһаайыытын толору өйүүбүт, — дииллэр Эбээн Бытантай урбаанньыттара.

«Бытантай уоттара» хаһыат