Портал малого и среднего
предпринимательства

Республики Саха (Якутия)
Центр поддержки предпринимательства РС(Я)
8-800-100-58-80
Бесплатная «горячая линия»
для предпринимателей
15 августа 2017
Чурапчы улууһун Арыылаах нэһилиэк олохтоохторун сүрүн кыһалҕалара быһаарылынна.

Улууспут уһук  сытар хоту нэһилиэгэр, Арыылаахха, “Маарыкчаан” ПО маҕаһыына уонна бэкээринэтэ сабыллан, олохтоохтор килиэбинэн хааччыллыыга бэрт эрэйи көрсөн кэллилэр. Бу күннэргэ ол сүрүн кыһалҕалара   быһаарыллан сүргэлэрэ көтөҕүллэн сылдьар.

Маныаха  нэһилиэк кэскиллээх ыччата Моисей Николаевич Борисов  быйыл  саас бэкээринэ тэринэн үлэлэтэр соруктаах саҕалааччы предприниматель гранын көмүскээбитэ.  Эдэр предприниматель ылсыбыт дьыалата  олоххо киирэригэр улуус дьаһалтатын үбүлээһиниттэн 250 т.с. суумалаах  субсидия көрүллүбүт. Онон бэкээринэни үлэлэтэргэ туох баар наадалаах оборудование тиэллэн,  таҥыллан туруоруллубут.

Моисей Николаевич билиһиннэрбитинэн, “Маарыкчаан” ПО урукку маҕаһыынын үс сыл устата  төлөһөн атыылаһарга дуогабардаһан,  бэкээринэтин онно аһан үлэлэтэн эрэр. Бурдугун бэйэтэ тиэйэн хааччыммыт.  Күһүҥҥү  тоҥоруу  буолуор диэри  быйыл саас муус  ылан хаһааммыт.

Бу күннэргэ сибиэһэй килиэп, батон  олохтоох нэһилиэнньэҕэ хамаҕатык атыыланар. Күҥҥэ ортотунан 100  килиэп оҥоһуллар. Сырылас куйааска, от үлэтин кэмигэр дьон-сэргэ тыын суолталаах боппуруостара быһаарыллан махталлара улахан: “Кэлэр-барар айанньыттарга килиэп үлэһэн, элэ-была тылбыт баранара. Улуус киинигэр киирдибит да,  хас да күҥҥэ сиир  килиэппитин сосуһан-сысыһан кэлэр кыһалҕабыт тохтоото. Оҕобутугар, уолбутугар махтанабыт, ылсыбыт дьыалата ситиһиилэннин,”—диэн үөрүүлэрин үллэстэллэр.

Моисей Николаевич үлэтин хайысхатын өссө сайыннаран, бурдук ас көрүҥүн элбэтэр былааннаах. Ону тэҥэ бу базатыгар бордуукта маҕаһыынын үлэлэтэр соруктаах.  Кини уустук эрээри, дьоҥҥо-сэргэҕэ олус суолталаах үлэни ылсан олоххо киллэрбитигэр улуус дьаһалтатын баһылыгар Андрей Тимофеевич Ноговицыҥҥа, “Маарыкчаан” ПО бырабылыанньатын председателигэр Григорий Викторович Смирниковка, Арыылаах нэһилиэгин дьаһалтатыгар истиҥник махтанар. Эдэр киһиэхэ үлэтигэр ситиһиилэри баҕарыаҕыҥ.

Автор: Анна ЗАХАРОВА.