Новости
Дьоҕус урбаан сайдыыта
20 ноября 2018

Ырыынак ураты оҥоһуктары, хатыламмат үлэлэри ирдиир

Хас сыллаахха эбитэ буолла, уонча сыл ааста буолуо, улууспут киинигэр турар Аартык атыы-эргиэн дьиэтин иккис этээһигэр саҥа аһыллыбыт мастарыскыайга бэлэххэ диэн анаан курууска5а бэйэм талан ылбыт ойуубун, суруктатан-бичиктэтэн түһэртэрэн турардаахпын. Бэлэхтээбит киһим чуо киниэхэ анаммыт оҥоһугу тутан үөрүү бө5ө буолбута. Төһө да5аны билигин полиграфия, хаартыска биисинэһин эйгэтигэр өссө элбэх, эрдэ харахтаан да көрбөтөх өҥөлөрбүт киирбиттэрин иһин, оччолорго итинник хатыламмат оҥоһуктар киэҥник тар5ана илик буолан сонун, эриэккэс көстүү этэ. Урбаан эйгэтигэр саҥа үктэнэн эрэр эдэр ыал төһөлөөх элбэх киһиэхэ итинник үөрүүнү бэлэхтээбиттэрэ, махтал тылларын истибиттэрэ буолуой? Киһи аа5ан сиппэт буолла5а…

Анна уонна Эдуард Ивановтар Artfamily диэн дьо5ус биисинэстэрэ ырыынак кыра муннугуттан са5аламмыта. Ыал ийэтэ кыра о5отун дьиэтигэр көрөн олорон тэһийбэтэ ханна барыай? Талааннаах киһи тугу эмитэ айыан-тутуон, оҥоруон ба5арар ба5а санаата батарбакка, эдэр ыал сүбэлэһэн баран кыра Epson принтер атыылаһаннар хаартыска бэчээттээһининэн дьарыктанарга сананаллар. Аан бастакы улахан сакааспыт Алмазкредитсервис тэрилтэттэн киирбитэ. Ол кэнниттэн киһи ылсан үлэлээтэ5инэ син дохуоттаныан сөп эбит ээ — диэн эгди буола түспүппүт. Уонна ырыынакка хос о5отун аренда5а ылан бастакы хардыыларбытын оҥорон барбыппыт,- диэн кэпсэтиибит са5аланар. Биллэн туран, полиграфия5а букатын сыһыана суох киһи биир күн турда да5аны, Грамота оҥорон, хаартыска бэчээттээн киирэн барбат буолла5а. Анна бэйэтэ художественнай училище дизайн салаатын бүтэрбит буолан дипломнаах исписэлиис. Оттон Эдуард реклама агенствотыгар үлэлээбит кырата суох уопуттаах, онон бэйэ-бэйэлэрин ситэрсэн, толорсон биэрбиттэрэ айымньылаах дьиэ кэргэн күргүөмнээх үлэтин олуга буолбута.

Түргэн интернет, араас элбэх үөрэтэр курстар сайдарга, саҥа таһымҥа тахсарга, саҥаттан саҥа өҥөнү нэһилиэнньэ5э оҥорорго сүрүн күүс буолаллар. Ивановтар онтон хаалсыбаттар, биир идэлээхтэр икки ардыларыгар кыра күрэстэһии, нууччалыы эттэххэ конкуренция баара биир сиргэ олордубат, атынтан атын идеялары, сүүрээннэри көрдүүргэ күһэйэр, тэптэрэн биэрэр. Бастаан утаа Эдуард урбаанньыт быһыытынан регистрацияны ааһан үлэлээн са5алаабыт эбит буоллахтарына, былырыыҥҥыттан Анна эмиэ туспа баран, бизнес-инкубаторга хос куортамнаан онно үлэлиир. Эдуард сүрүннээн хаартыска, Грамота бэчээттиир буолла5ына, Анна хайысхата ордук айымньылаах диэххэ дуу? Уруһуйдуур дьо5урдаах кыыс сахалыы, хатыламмат аккырыыккалары, сувенирдары оҥорор, дизайн өттүгэр күүскэ үлэлэһэр. Кэргэнниилэр кэпсииллэринэн, дьон билигин биир халыып буолбакка, хатыламмат, киимэхэ да суох көстүүлээх сувенирдары, оҥоһуктары ордук хото сакаастыыллар. Ырыынак ирдэбилигэр сөп түбэһэн Ивановтар ол иһин өҥөлөрүн ахсаанын тохтообокко хаҥаталлар: общественнай сирдэргэ вывескалар, эмблемалар, таҥаска, куруускаларга сурук, ойуу түһэрии, топпердар, баннердар. Аны билигин эдэр дьон ортотугар телефон ха5ыгар талбыт ойууларын түһэртэрэргэ сакаас үгүстүк киирэр эбит.

Эдэр урбаанньыттар өҥөлөрүн өссө биир көрүҥэ ыҥырыынан тиийэн бырааһынньыктары, айыл5а5а тахсан дьиэ кэргэни хаартыска5а түһэрии буолар. Эдуард сотору кэминэн нэһилиэк киинигэр өссө биир үлэлиир туочуканы арыйаары сүүрэ-көтө сылдьар. Оччотугар о5олорго, дьиэ кэргэҥҥэ, Саҥа дьылга аналлаах фотозоналары оҥорон фотосессия5а ылсан үлэлиэм этэ диэн инники былааннарыттан кыратык кэпсээтэ. Манна да5атан эттэххэ, Ивановтар билигин баар өҥөлөрүнэн муҥурдаммакка, баннер бэчээттиир, лазернай гравировка түһэрэр анал аппаратуралары ылар улахан ба5а санаалаахтар. Оччотугар уулусса5а туруоруллар растяжкалары, ыйынньыктары, баннердары оҥоруохпут этэ диэн ыралыыллар. Билиҥҥитэ итинник улахан кээмэйдээх үлэлэри манна дизайнын оҥорон баран Дьокуускайга бэчээттэтэн а5алаллар эбит.

Ураты оҥоһуулаах бородууксуйаларын иһин дьон кэлиитэ үксээн, сакаас элбээн, түүннэри үлэлиир кэмнэрэ кытта үүммүттэрэ, инньэ гынан Artfamily дьиэ кэргэн биисинэһэ өссө икки үлэ миэстэтин таһаарда. Үлэлиир ба5алаах, айымньылаах кыргыттар Юлия уонна Сахаяна эмиэ биир сиргэ олороллорун ахсарбаттар, саҥаттан саҥа суоллары көрдүүллэр. Холобура, соторутаа5ыта эрэ таһымнарын үрдэтэн профессиональнай хаартыска5а түһэрии кистэлэҥнэрин арыйар кууруска үөрэнэн кэлбиттэр. Онон эдэр, эрчимнээх хамаанда саҥа үрдэллэри, кирбиилэри ыларыгар кыах баар, далаһа ууруллар. Урбаан, чааһынай бас билии үлэтэ бэйэтэ туспа умсугутуулаах, бэйэтэ туспа сокуоннардаах. Онтон сүрүнэ олорон биэрэр сатаммат. Куруук иннин диэки дьүккүйүөхтээхин. Оччо5уна эрэ сайдыы барар. Эдэр дьон ону таба өйдөөн, үүнэргэ, үөрэнэргэ, үлэлииргэ ба5алаахтар, былааннара киэҥ.

Ити да буоллар, Ивановтары аҥардас үлэ5э умса түспүт ыал диэн санаа үөскэппит буоллахпына, букатын сыыһа, Анналаах Эдуард общественнай олохтон, араас аһымал акциялартан хаһан да туора турбаттар, кыахтарын иһинэн бэчээт бородууксуйатынан, сувенирдарынан көмөлөһө тураллар. Биһиги, улуустаа5ы Ыччат управлениета бу студияны кытта үлэлэспиппит букатын ыраатта. Бэйэ5ит да5аны билэ5ит дии, бюджет харчыта счетунан төһө өр ааһарын. Оттон кинилэр биһиэхэ утары бараннар ыксалынан наадалаах атрибуттарбытын иэс оҥорон элбэхтэ абырыыллар. Араас таһымнаах күрэхтэр улууска тиһигин быспакка ыытыллаллар, онно барытыгар кубоктары, мэтээллэри, футболкалары барытын Ивановтарга сакаастыыбыт. Аны туран Анна бэйэтэ дизайнер идэлээх буолан биһиги төбөбүтүгэр ойуулаан көрбүт, ба5арбыт идеяларбытын барытын олоххо киллэрэр талааннаах, хаһан да5аны аккаастаабат. Ол иһин бу кыһын Ыччат баалыгар Бастыҥ социальнай партнер диэн ааты мээнэ5э иҥэрбэтэхпит диэххэ наада. Бииргэ үлэлэһиибит өссө биир холобурун кэпсиэхпин сөп бу күннэргэ Соморсунтан төрүттээх эдэр киһи Спартак Еремеев улаханнык ыалдьан, эмтэнэ барарыгар харчы хомуйан аһымал акциялары ыыта сылдьабыт. Онно Artfamily студия хас да5аны үлэлэрин лот быһыытынан биэрбиттэригэр түгэнинэн туһанан махтаныам этэ. Куруук үөрэ, ис-истэриттэн сырдыгынан сыдьаайа сылдьар дьону кытта үлэлиир, алтыһар олус үчүгэй, чэпчэки, — диэн улуустаа5ы ыччат управлениетын специалиһа Саргылана Неустроева кэпсиир. Ивановтар управлениены эрэ кыттта буолбакка, элбэх оскуолалары, уһуйааннары, о5о айымньытын дьиэтин, Үктэл реабилитациялыыр киини кытта ыкса үлэлэһэллэр, кыһал5аларын быһаарарга элбэхтэ күүс-көмө буолаллар.

Аҥардас дохуот эрэ иннигэр үлэлиир киһи ол үлэтиттэн түргэнник сал5ар, сылайар диэччилэр. Үлэ үөрүүнү, үлэҥ түмүгэ дуоһуйууну а5алыахтаах. Биллэн туран, билиҥҥи ырыынак үйэтигэр хамнас боппуруоһа эмиэ кэнники былааҥҥа быра5ыллыбат. Ол эрээри ити икки өйдөбүл силбэстэхтэринэ, сөптөөхтүк аттарылыннахтарына кыайыы, ситиһии, олохтон астыныы кэлэр буолла5а. Анналаах Эдуарды кытта кэпсэтэр кэммэр кинилэр үлэлэрин туһунан кэпсиир кэмнэригэр харахтара уоттанарыттан, сирэйдэрэ-харахтара сырдыырыттан сылыктаатахха, иккиэннэрин силбии туппуттар. Түгэн көһүннэ5инэ тэрилтэ5э үлэлииргэ сөбүлэһиэххит этэ дуу?- диэн кэпсэтэн бүтэн, тахсаары туран ыйытабын. Дьонум иккиэн: Суоох-суох, тэрилтэ5э киһи айымньылаахтык үлэлиир кыа5а кыра, оттон уонна бэйэбит иннигэр үлэлииргэ бу сыллар тухары үөрэннибит да5аны. Бэйэбит инникибит, дохуоппут бэйэбититтэн эрэ тутулуктаах, — дии хааллылар. Оннук, иннигит диэки эрэллээхтик эрдэн иһин! Ба5а санааларгыт олоххо киирдиннэр, илии сылааһынан илгийэр айымньылаах оҥоһуктаргытынан дьону-сэргэни үөрдэ туруҥ.

Елена Александрова.

Есть вопрос?
Позвони 8-800-100-58-80