Ханна да буоларын курдук, биһиги улууспутугар эмиэ дьоҕус урбаан кэҥиир, сайдар, саҥаттан саҥа үлэлэр элбииллэр. Өссө уонча сыллааҕыта „урбаанньыт“ диэн тылы иһиттэхпитинэ атыыһыт дьону харахпытыгар оҥорон көрөр эбит буоллахпытына, билигин оҥорон таһаарыы киэҥник сайдан эрэр диэххэ наада. Аммаҕа баар, дьон күннээҕи кыһалҕаларын чэпчэтэр, олохторун киэргэтэр үлэлэр тустарынан хаһыаппыт бүгүҥҥү нүөмэригэр рекламалыы таарыйа диэххэ дуу, сырдатарга сананныбыт. Кимиэхэ эмит туһалаарай, көмөлөһөөрөй диэн санааттан.
Химчистка. Егор Бубякин – эдэр, аныгы көрүүлээх, урбаан эйгэтигэр саҥа үктэммит киһи. ХИФУ общественноһы кытта сибээс уонна реклама кафедратын бүтэрэн баран төрөөбүт Амматыгар кэлэн манна суох үлэлэри арыйан хас да хайысханан үлэлээн эрэр. Бастакытынан, массыына, сымнаҕас миэбэл, көбүөр ыраастыыр. Эппит аадырыскар тиийэн үлэлиир буолан олус табыгастаах. Киин куораты кытта тэҥнээтэххэ сыаната даҕаны удамыра үөрдэр. Холобура, маассына салонун бүтүннүүтүн сууйара 3500 солкуобайтан саҕаланар, тимир көлө кээмэйиттэн көрөн сыана халбаҥныыр. Оттон көбүөр, ковролин – квадратнай миэтэрэтэ ортотунан 150 солкуобай. Улаханнык киртийбит угловой диван ыраастааһына 2300 солкуобайга тиийиэн сөп. Аныгы сиэринэн инстаграм диэн социальнай ситимҥэ киирэн махтал суруктары, хаартыскаларын көрдөххө, дьон хото туһаналлар эбит.
Егор үлэтин өссө биир хайысхата – эмиэ улууспутугар билиҥҥитэ суох өҥ, киэргэл буолар, декоративнай плиткалары оҥоруу. Сакаасчыттар үксүн куукуна ыскаабын «фартугун“ киэргэтэргэ сакаастыыллар эбит, маннык плиткаларынан истиэнэни эмиэ эпсиэйдиэххэ сөп. Егор кэпсииринэн, технологията улахан уустуга суох, анал суурадаҕыһы формаларга кутан куурдар эбит. Сүрүннээн үс көрүҥ араас ойуулаах формалары туттабын диир. Сакаасчыт дьиэтигэр тиийэн бэйэтэ кээмэйин устар, плиткалары оҥорон аҕалан ыйаан биэрэр. Ханнык даҕаны сурунаалга баар хаартыскаттан итэҕэһэ суох гына оҥорон дьиэҕит ис бараанын тупсарар.
Эдэр урбаанньыт өссө биир интэриэһинэй үлэлээх. Лазернай гравировка оҥорор анал станок атыылаһан сувенирдары, топпердары, брелоктары, бейджиктары, статуэткалары, онтон да атын араас күннээҕи олоххо, бырааһынньыктарга, үлэҕэ туттуллар, бэлэх буолар оҥоһуктарга сакаас ылар. Муона алааска баар «Креатив“ салоҥҥа биир хоһу ылан, Пермьтан дьоҕус аппараты сакаастаан ылан быйылгыттан саҥа өҥөнү арыйда. Улахан үлэтэ компьютерга дизайн оҥоруутугар сытар, баҕарбыт ойуугун-мандаргын уруһуйдаан ханнык баҕарар матырыйаалга лазерынан быһан биэрэбит,- диэн Егор кэпсиир. Үксүн Аммаҕа сыһыаннаах сувенирдары хото сакаастыыллар эбит, чахчы, ыалдьыттар да кэллэхтэринэ, бэйэн атын дойдуга барар түгэҥҥэр „кыбынан“ сылдьарга бэртээхэй буолсук. Интэриэһиргээбит буоллаххытына 8-924-760-75-49 телефоҥҥа эрийэн билсэ сылдьаарыҥ.
„Тыый, оттон маннык үгүс үлэни хайдах барытын үмүрү тутар оҕонуй?» — диэн сорохтор соһуйа ааҕыаххыт. Ыйыталаһан билбитим, Егор бэйэтэ үлэлиирин таһынан үлэ миэстэтин таһааран үс үлэһиттээх эбит, икки киһи химчисткаҕа, биир киһи плитка оҥоруутугар эппиэтинэстээхтэр. «Өссө иистэнэр кыыс баара буоллар эргэрбит сымнаҕас миэбэл таһын уларытарга, массыына салонун перетяжкалыырга ылсыахпын баҕарабын. Манна биһиэхэ ким даҕаны оннугунан дьарыктаммат дии. Оттон ыаллыы сытар Чурапчыга сайдыбыт өҥө буолар“,- диэн эдэр уол биир баҕа санаатын быктарар. Бэйи, тохтоо, аныгы кэм ыччата диэх курдук, идеята итинэн эрэ бүппэт: дьиэни тас өттүттэн эпсиэйдииргэ анал плитакалары оҥорон атыыга таһаарбыт киһи диэн ырыҥалатан көрө сылдьар.
Тротуарнай плитканы оҥоруу. Алтан нэһилиэгэр тротуарнай плитка оҥорор урбаанньыт баарын кулгааҕым уһугунан истэн аһарбыттаахпын. Тутуу бөҕө барар, дьон дьиэлэрин таһын тупсарарга саҥаттан саҥа ньымалары көрдүүр кэмнэригэр олус туһалаах буолсук диэммин Сергей Сергеевич Кузьмины кытта кэпсэтэ сырыттым.
Улууска эмиэ суох биир саҥа сүүрээҥҥэ ылсан үлэлэһэр эдэр киһи аныгы олох сиэринэн интернет нөҥүө Киров куораттан оборудование сакаастаан ылан, эмиэ интернетинэн үөрэнэн тротуарнай плитка оҥоруутун былырыыҥҥыттан саҕалаата. Сыаната киин куораты кытта араа-бараа, чэпчэки да курдук буолан бэйэтин нэһилиэгин дьонуттан эрэ буолбакка, Амматтан кытта сакаас киирэр эбит. Сэттэ араас көрүҥ быһыылаах плиткалары оҥорор буолан талар кыах эмиэ баар. Бары технологията тутуһуллубут, хаачыстыбалаах оҥоһуктары дьон сэҥээрэн эрэллэр. Мин көрдөхпүнэ сыралаах соҕус үлэ курдук, Алтан карьердарыттан кумах тиэйэн аҕалан, цеменнээн суурадаһыгын оҥорон формаларга кутан икки күн куурдан, үһүс күнүгэр таһааран өссө биир нэдиэлэ устата туруорар эбит. Ол кэнниттэн үлэ түмүгүн көрөр хайдахтаах курдук үчүгэй буолуой? Били телевизорга дачалары тутары кэпсиир биэриилэртэн туох да итэһэҕэ суох тиэргэни оҥостуохха сөп эбит. Онон Сергей Сергеевичка суотабайыгар, 8-924-868-51-96 төлөпүөнүнэн эрийэн сиһилии билсиэххитин, сакааскытын биэриэххитин сөп.
Биир сиргэ тэпсээҥнээн турар киһи ырааҕы өтүппэт диэн бэргэн этиинэн сиэттэрэн Сергей Сергеевич урбаанын сайыннаран, кэҥэтэн билигин арболитнай блоктары оҥорууга ылсан эрэр эбит. Дойдубутугар тутуу маһа кырыымчык буолан эрэр, онон инникитин бу тутуу матырыйаала наада буолара үксүөҕэ диэн биир бэйэм сабаҕалыыбын.
Бу икки эдэр ыччаттары кытта кэпсэтэн баран, «саха сатаабатаҕа суох“~ диэн этиигэ өссө төгүл итэҕэйдим. Государственнай тэрилтэлэргэ сарбыйыы бара турар кэмигэр бэйэ дьыалатын арыйан таһарыылаахтык үлэлиир дьонтон киһи астынар, холобур ылар. Онон бу матырыйаал ситимин быспакка, хаһыаппытыгар үчүгэй үлэлээх урбаанньыттары өссө даҕаны сырдата туруохпут.
Елена Александрова.
Амма.