Балаҕан ыйын 7-11 күннэригэр Эдьигээн нэһилиэгэ төрүттэммит күнүгэр аналлаах бырааһынньыктааҕы дьаһаллар бэрт тэрээһиннээхтик ыытылыннылар. Ол курдук, Эдьигээн күнүгэр анаммыт тэрээһиннэр чэрчилэринэн иистэнэр, уһанар дьоҕурдаах дьон ортолоругар эбэҥкилии харысхаллар күрэхтэрэ аан бастакытын буолан ааста. Манна 15 маастар кыттыыны ылла, ол Кыстатыам, Баахынай, Эдьигээн нэһилиэгин олохтоохторо. Бу күрэҕи Эдьигээн нэһилиэгин дьаһалтата, оройуоннааҕы култуура уонна туризмы сайыннарыы отдела, норуот уус-уран идэтин уонна искусствотын сэбиэтэ иилээн-саҕалаан тэрийдилэр. Кыттааччылар оҕуруоттан, балык уҥуоҕуттан, таба муоһуттан, ордук түөскэ кэтиллэр харысхаллары оҥорбуттар.
СӨ Норуотун маастара Гаврильева Н.Е., иистэнэр дьоҕурдаах Луковцева Г.В., Массаева Р.Р. дьүүллүүр сүбэ састааптаах биир күн түмсэн кыттааччылар үлэлэрин көрдүлэр. Балаҕан ыйын 11 күнүгэр норуот уус-уран идэтин уонна искусствотын оройуоннааҕы сэбиэтин бэрэссэдээтэлэ Петрова Р.Н., үөрүүлээх быһыыга-майгыга эбэҥкилии харысхал күрэҕин кыайыылаахтарыгар, анал аат хаһаайыттарыгар өйдөбүнньүк грамоталары, бэлэхтэри туттартаата.
Ол курдук, «Өбүгэ кэскилэ» анал аат хаһаайкатынан — Оконешника Мирослава 8 саастаах буолла, «Дьиэ кэргэн араҥаччыта» — Васильева Мария Николаевна, «Айан харысхала» — Булдаков Евгений Николаевич (Кыстатыам), «Дьоһун айар үлэ» — Петрова Ольга Николаевна, «Үгэстэри уҥуордаан» — Львова Лена Анатольевна, «Аныгылыы көрүү» — Борисова Лилия Семеновна, «Өбүгэ үгэһин утумнааччы» — Егорова Туйаара Алексеевна. Үһүс миэстэҕэ Протопопова Джемма Николаевна таҕыста уонна блендер бэлэҕи тутта. Кини таба муоһун синньигэс гына эрбээн, тимэх курдук оҥорон сукунаҕа куоҕас көтөр көтөн иһэрин, бэрт табыгастаахтык оҥорон таһаарбыт. Иккис миэстэ Иванов Владимир Владимирович буолла, бирииһэ электрическэй чаанньык. Кини маһынан кыһан байанай быһыытын кыһан, чочуйан таһаарбыт. Оттон күрэх кыайыылааҕынан Львова Пелагея Дмитриевна билиннэ уонна иистэнэр массыынаны бэлэх ылла. Кини түөскэ кэтиллэр куоҕас атаҕа моһуоннаах киэргэли оҕуруонан тиһэн оҥорбут, дьүүллүүр сүбэ чилиэннэрэ Пелагея Дмитриевна эбэҥки норуотун үгэһин тутуһан оҥорбут оҥоһугун биһирээбиттэрин иһитиннэрдилэр.
Эбэҥкилии харысхал күрэҕин кыттааччыларын үлэлэрин оройуоннааҕы историческай музейга балаҕан ыйын 15 күнүттэн тиийэн көрүөххүтүн сөп. Быыстапка биир нэдиэлэ курдук туруоҕа диэн тэрийээччилэр иһитиннэрдилэр.