×

Следите за новостями в Telegram-канале Центра «Мой бизнес» Якутии

Читать
Новости
Эдэр ыччат туризмҥа ылсар
1 августа 2022

Мээндиги нэһилиэгэр өссө биир туристическай база баар буолла. Эдэр урбаанньыт Айаал Попов дьону сынньатар базатын үөрүүлээхтик аста. Дьэ хайдах база тэрилиннэ, туох баарый манна?
Мээндиги көхтөөх ыччата Айаал Попов Амма өрүс биэрэгэр дьону сынньатар базатын үлэлэтэн саҕалыа. Бастакы ыалдьыттар атырдьах ыйын 3 күнүгэр кэлэллэрэ былааннанар. “Бу базабын бэйэм маһыни бэлэмнээн туттум. Ааспыт сылтан туризмаҥа ылсарга быһаарыммытым. Бэйэм юрист үөрэхтээхпин. Социальнай контракт диэҥҥэ кыттан, биисинэс былааммын суруйан көмүскээбитим. Үөрүөм иһин, онтум табыллыбыта. Ону сэргэ дьарыктаах кииҥҥэ эмиэ бырайыак суруйан биэрэн, социальнай управлениеттан уонна дьарыктаах буолуу кииниттэн уопсайа 450 000 солкуобай ылбытым. Онтон нэһилиэгим дьаһалтата,баһылык Илья Владимирович Семенов өйөөн, 100 000 солкуобайы көрөн, базабын ситэрэн, оҥорон бүтэрдим. Онон кинилэргэ махталым улахан. Ону кытта биллэн туран төрөппүттэрим улахан күүс-көмө, сүбэ-ама буоллулар. Бу базабын өссө кэҥэтэн, хас да дьиэлэри тутуом. Кыһыннары үлэлэтэр санаалаахпын. Онон аата да оннук “Все сезоны” диэн. Манна кэлэн ыраас салгыҥҥа сынньанан, балыктаан барыахха сөп. Хайыһардыахтарын да сөп”, — диэн Айаал Семенович санаатын үллэстэр. Дьэ чахчы да база турар сирэ кыраһыабай. Сэмэн Ураһата диэн сиргэ, олох Амма өрүһү өҥөйөн турар. Дьиэ кемпиннии быһыылаах. Иһигэр сынньанарга бары усулуобуйа оҥоһуллубут. Киэһэ хараҥаҕа уот холбонон ураты эйгэни үөскэтэр эбит. Аттыгар уот оттор оллоон хаһыллан, ыскамыайкалар турбуттар.

Өссө сотору кэминэн беседкалар бэлэм буолуохтара. Кэнники киирэр кемпинг –дьиэлэр бары тус туспа олбуорданаллар. Барыта аныгылыы быһыылаахтык толкуйдаммыт. Маны барытын Айаал бэйэтэ эт илиитинэн тутан-хабан оҥорбут. Ол курдук кини оскуолаҕа үөрэнэр эрдэҕиттэн . убайдарын батыһа сылдьан тутууга сылдьыбыт, тэҥҥэ үлэлэспит. Онон тутуу ымпыктарын-чымпыктарын билэн, билигин ол дьарыга көмөлөөх буолан, базатын бэйэтэ туттаҕа.

“Улахан тутууга уһуйбут убайдарбар махталым улахан. Кинилэр тутууга батыһыннара сылдьан үөрэппиттэрэ көмөлөөх буолла. Ону сэргэ мастарбын кинилэр пилорамаларыгар эрбэппитим. Маны сэргэ сүбэ-ама буолбут, маннык туристар кэлэн сынньанар базаларын хаһыс да сылын салайар Амматтан Ньургун Неустроевка эмиэ махтанабын”, — диэн этэр Айаал. Эдэр урбаанньыты бэйэтин дьыалатын арыйбытынан нэһилиэк баһылыга Илья Семенов, улуустааҕы кииннэмиит бухгалтерия салайааччыта, Мээндиги нэһилиэгин куратора Роман Алексеев, улуустааҕы дьарыктаах буолуун кииниттэн Александра Софронова, чугас дьоно, табаарыстара тириэртилэр.

“Мин бу базаны көрөн олус астынным. Аныгылыы тэриллибит. Хаһаайын этэринэн икки киһиттэн саҕалаан 10 киһиэхэ тиийэ кэлэн түһүөхтэрин сөп. Баар бырагыраамалары сөптөөхтүк туһанан, онно кыттан маннык база улууспутугар тэриллибитэ наһаа үчүгэй. Мээндиги бэйэтэ да баай историялаах, кэрэ-бэлиэ сирдээх дойду. Онон инникитин манна ыалдьыт кэлэ туруо диэн эрэнэбин. Айаал Семенович базатын өссө сылы эргиччи үлэлэтэр былааннааҕа үөрдэр. Бэйэтэ спортсмен, спорду өрө тутар буолан, инникитин манна хайыһардатыан иҥин баҕарар. Онон өссө төгүл эдэр урбаанньыты эҕэрдэлиибин уонна ситиһиилэри, сайдар аартыга кэҥии турарыгар баҕарабын”, — диэн улуустааҕы кииннэмиит бухгалтерия салайааччыта, Мээндиги нэһилиэгин куратора Роман Алексеев санаатын үллэһиннэ. Аммабыт кэрэ айылҕатын сэргии, өрүспүт ыраас уутугар сөтүөлүү кэлэр дьон маннык аныгылыы оҥоһуулаах базаларга кэлэн сынньанан, дуоһуйан бараллара, ол кэнниттэн кэрэ кэпсээн оҥостон, улууспутун аатын өссө өрө таһаара, киэҥ сиргэ ааттата турдун.

Источник