Новости
Үөһээ Бүлүүгэ “Мила” гостевой дьиэ арылынна
5 марта 2017

Үөһээ Бүлүү улууһун урбаан эйгэтигэр үөрүүлээх түгэн үүннэ, ол курдук, улуус киинигэр толору хааччыллыылаах, сахалыы сиэдэрэй стиллээх “Мила” гостевой дьиэтэ арылынна.

Улууска күндү бэлэҕи уопуттаах урбаанньыт Елена Прокопьевна Михайлова оҥордо. Елена Прокопьевна маҕаһыын эйгэтигэр өрө таһаарыылаахтык үлэлии-хамсыы сылдьар.

“Мила” гостевой дьиэ 8 хостоох, уопсайа 13 түһэр миэстэлээх. Суунар-тараанар сирдээх уонна ас астанарга, таҥас суунарга туспа хостордоох. Бу дьиэ тутуута 2013 сыллаахха саҕаламмыта. “Мила” дьиэтин иһэ сахалыы оһуордардаах, харысхаллардаах, сиэлинэн-кылынан оҥоһуктардаах, бу олус ураты, интэриэһинэй.

Гостевой дьиэ үөрүүлээх арыллыыта муус устар 27 күнүгэр, СӨ автономията төрүттэммит күнүгэр түбэспитэ мээнэҕэ буолбатах, Елена Прокопьевна төрөөбүт дойдутун таптыыр, ытыктыыр патриотунан буолар. “Мин саныахпар, төрөөбүт дойдутугар үлэлиир урбаанньыт сиригэр-уотугар тугу эрэ саҥаны киллэриэхтээх, оҥоруохтаах. Бу санааттан сиэттэрэн, тапталлаах бөһүөлэкпитигэр бэлэх оҥордубут. Гостевой дьиэбит тутулларыгар Үөһээ Бүлүү  дьаһалтатын өттүттэн көмө харчы биэрбиттэрэ, СӨ урбааны өйүүр фондатыттан 1 мөл. солк. чэпчэтиилээх кредит ылбыппыт. Барыларыгар махталбын тиэрдэбин!” – диэн санаатын үллэһиннэ.

 

Екатерина Николаева, представитель Центра поддержки предпринимательства в Верхневилюйском улусе