Улууспутугар аан маҥнайгытын дьону кыраһыабай оҥорорго үлэлэһэр салон арылынна. Тупсаҕай көрүҥнээх, толору хааччыллыылаах саҥа салону улууска, өрөспүүбүлүкэҕэ биллэр ааттаах-суоллаах парикмахер Майя Ушницкая арыйда.

Биһиги Майя ситиһиилэрин хаһыакка мэлдьи сырдатабыт, үөрүүтүн тэҥҥэ үллэстэбит. Икки сыллааҕыта, кинини кытта кэпсэтиигэ, салон туттар баҕалааҕын туһунан эппиттээх. «Ыра санаабын олоххо киллэрээри, бары сырабын ууран туран үлэлиибин», — диэбитэ. Быйыл ол сыалын-соругун толордо.

Майяны үөрүүлээх, долгутуулаах малааһынынан күүс-көмө буолбут дьоно, бэриниилээх клиеннэрэ, аймахтара, дьүөгэлэрэ кэлэн эҕэрдэлээтилэр. Үөһээ Бүлүү улууһун баһылыгын солбуйааччы Спиридон Борбуев, Үөһээ Бүлүү бөһүөлэгин баһылыгын солбуйааччы Елена Гурьева, социальнай управление начальнига Лидия Никифорова, урбааны өйүүр киини салайар Екатерина Николаева алгыс маанытын, эҕэрдэ бастыҥын тиэртилэр. Бары бу салон улуус кэрэ аҥаардарыгар бастыҥ бэлэх буоларын бэлиэтээтилэр. «Киһи эрэ киирэн сынньанар, тупсан, киэркэйэн санаата көтөҕүллэр, үөрэр, астынар дьиэтэ», — дэстилэр.

Аалай кыһыл лиэнтэни салон хаһаайката Майя Ушницкая, улуус баһылыгын солбуйааччы Спиридон Борбуев, урбааны өйүүр киини салайар Екатерина Николаева быстылар. Малааһын киэһэтин Сахаайта Мойтохонова ыытта.

— Социальнай управлениены кытары социальнай хантараак түһэрсэммин, көмө харчы ылбытым. Бу харчынан тутуу матырыйаалларын атыыласпытым. Ону сэргэ, бөһүөлэк дьаһалтата, урбааны өйүүр киин, аймахтарым, чугас дьонум көмөлөстүлэр. Салон толору хааччыллыылаах, бары ирдэбилгэ толору эппиэттиир. Манна алта-сэттэ маастар туран үлэлиэн сөп. Визаж, тыҥырах оҥоруутун өҥөлөрө баар буолуохтара. Дьокуускай куораттан, ыаллыы сытар улуустартан парикмахердар кэлэн араас маастар-кылаастары ыытыахтара, — диир «PERSONA» хаһаайката.

Урбааны өйүүр киин салайааччыта Екатерина Николаева:

— Наадалаах дьиэ үлэҕэ киирдэ. Манна кэрэ аҥардар эрэ буолбакка, эр киһи да сылдьыан сөп. Күүспүт, кыахпыт баарынан өйөөтүбүт, өссө даҕаны өйүөхпүт турдаҕа. Манна даҕатан эттэххэ, биһиги Майянан киэн туттабыт. Киһиргээбэккэ эттэххэ, кини түөрт Бүлүү бөлөҕөр бастыҥ парикмахердартан биирдэстэрэ.

Үөрүүлээх киэһэҕэ ыалдьыттар PERSONA диэн суруктаах үс этээстээх минньигэс туорду амсайдылар. Итиэннэ баттах оҥотторуутугар сыаналаах сертификаттар супер-бириис быһыытынан оонньонон улахан сэргэхситиини таһаардылар. Кэнтик орто оскуолатын директора Ольга Астанова биисинэскэ кылаабынайа ис сүрэхтэн баҕаран ылсыахха диэбитин курдук, Майя Ушницкая идэтигэр бэриниилээх уонна клиеннэрин кытары истиҥ сыһыаннаах. Онон кини элбэҕи ситиһэр уонна ситиһиэ даҕаны.

Автор: Мария ВАСИЛЬЕВА