Ыам ыйын 5 күнүгэр Үөһээ Бүлүү улууһун киинигэр Улуу Кыайыы 76 сылын көрсө “Үтүө санаа” аахсыйата ыытылынна. Д.С. Спиридонов аатынан 4 №-дээх орто оскуола алын сүһүөх учууталлара, үөрэнээччилэрэ уонна төрөппүттэрэ көхтөөхтүк кытыннылар.

“Бэллэкэ” маҕаһыыҥҥа “Үтүө санаа” долбууругар II “А”, “Б” кылаас салайааччылара Алексеева А.М., Иванова Н.Н. үөрэнээччилэри уонна төрөппүттэри кытта кэлэннэр бородуукта атыылаһан, үөрэ-көтө үтүө дьыалаҕа кыттыстылар.

Бу тэрээһин Улуу Кыайыы 76 сылын туолуутугар анаан ыытылынна. Кырачааннар уурбут бородуукталара кимнээххэ тиксэрин туһунан учууталлар кылаас чааһыгар сиһилии кэпсээбит буоланнар, оҕолор кырдьаҕаска-кыаммакка көмөлөһөр эбиппит диэн бигэ санаалаах тарҕастылар.

Манна киирбит бородуукталары, табаардары “Бэллэкэ” маҕаһыын үлэһиттэрэ тыыл бэтэрээннэригэр, дьиэҕэ олорор кырдьаҕастарга дьиэлэригэр тиийэн туттардылар.

– “Үтүө санаалаах учууталларбытыгар, төрөппүттэргэ, үөрэнээччилэргэ  махтанабын!

«Үтүө санаа» долбуура биһиэхэ 2017 сылтан үлэлиир. Бу сыллар усталарыгар, күн бүгүҥҥэ дылы 828 киһи бородууктанан хааччылынна. Мин бэйэм үтүө санаа долбууругар бородуукталары уурарым таһынан, атыылаһааччылар эмиэ көмөлөһөллөр. Ону таһынан улууспутугар үтүө санаалаах дьон баар буоланнар, бэйэлэрэ үүннэрбит үүнээйилэриттэн, идэһэлэрин этиттэн, балыктаабыт балыктарыттан кырдьаҕастарга бэлэх ууналлар. Холобур, Нам олохтооҕо Константин Николаев уонна ИП «Сандалы» хаһаайката, Раиса Степанова. Кини астаабыт килиэбиттэн “Үтүө санаа” долбууругар ууран, куруук ыытыллар.

Биэнсийэлээхтэр биэнсийэлэрин ыллахтарына кэлэн бородуукта уураллар. Онон улууспут үтүө санаалаах олохтоохторугар ис сүрэхпиттэн махтанабын! Кыайыы күнүн көрсө араас хабааннаах үлэ биһиги нэһилиэкпитигэр көхтөөхтүк барара, Кыайыыны уһансыбыттарга дириҥ махтал, үтүө сыһыан буоларын туоһулуур”, – диэн “Бэллэкэ” маҕаһыын салайааччыта Люция Спиридонова санаатын үллэстэр.

Екатерина Николаева

ГАУ РС(Я) «Центр «Мой бизнес».