Атырдьах ыйын 27 күнүгэр Үөһээ Бүлүү бөһүөлэгэр «Үс Хоһуун» стадиоҥҥа улуус ыччатын “ActivVervil” форума буола турар. Манна улуус бары нэһилиэктэрин көхтөөх ыччата муһунна.
Күн устата ыччат 4 былаһааккаҕа арахсан предпринимательство, бэлиитикэ, успуорт, култуура, социальнай хайысхаларга кэпсэтэр, санаа атастаһар. Маны таһынан үлэ дьаарбаҥката тэрилиннэ. Уйулҕаны үөрэтээччилэр араас трениннэри ыыталлар, сорохтор маастар-кылаастары оҥороллор. Маннык форум ыччаты түмэр, сомоҕолуур диэн тэрийээччилэр этэллэр. Хас биирдии кыттааччы кэлэн интэриэһиргиир боппуруостарыгар толору хоруй ылар кыахтаах.
Киэһэ кэнсиэр, уоттаах-күөстээх дискотека буолара күүтүллэр.
Никифор Николаев, кыттааччы, история учуутала:
— Бу тэрээһиҥҥэ кэлэн элбэҕи истэ, көрө сылдьабын. Предпринимательство былаһааккатыгар саҥа саҕалыыр урбаанньыттарга сүбэни-аманы биэрдилэр. Элбэх туһалаах иһитиннэриини ыллым. Социальнайга тыа хаһаайыстыба сайыннарыытын туһунан кэпсээтилэр. Чуолаан, улууска ханнык хайысханы сайыннаран үлэлэтэр наадатын бэлиэтээтилэр, холобур, биһиэхэ тигээйи иитиитинэн ким да дьарыктаммат эбит.
Ааптар: Мария ВАСИЛЬЕВА.