Новости "Центра "Мой бизнес"
Үөһээ Бүлүү урбаанньыттарыгар анаан көрсүһүү буолла
27 мая 2022

Арассыыйаҕа Урбаан күнүн чэрчитинэн ыам ыйын 27 күнүгэр Саха Сиринээҕи Урбаанньыттар пуондаларын генеральнай дириэктэрэ Петр Федорович Максимов кэлэн, улуус урбаанньыттарын кытта көрсөн, араас хабааннаах сүбэ-ама биэрдэ, сөптөөх иһитиннэрии оҥордо.

Урбаан сайдыытын Пуондатын генеральнай дириэктэрэ Петр Федорович:

«Олус туһалаах көрсүһүү буолан, дьон араас ыйытыктарга сөптөөх харда ыллылар, ыарырҕатар түбэлтэлэригэр эппиэт иһиттилэр. Ол курдук, пуондабыт бэйэ дьыалатын арыныыга, үлэлэтиигэ харчы иэс биэрэр, сыл иккис аҥарыттан бырамыысаланнас өттүгэр эмиэ үлэлэһиэхтээхпит. Дойдуга буола турар быһыыны-майгыны учуоттаан, кирэдьиит бэриллэр бырыһыанын (ставкатын) урукку сыллар оннуларыгар хааллардыбыт.  Биһиги пуондабыт дьон олоҕо тупсарын туһугар үлэлиир. Түгэнинэн туһанан, барыгытын урбаан бырааһынньыгынан итиитик-истиҥник эҕэрдэлиибин, ситиһиини, табыллыыны баҕарабын!».

 

Дьокуускай куоракка консалтинговай «Фокус Про» хампаанньа үлэһитэ Сардана Наумова:

— «Мин дьону наймылаһан, кинилэри үөрэтэбин, үлэлэтэбин. Үөһээ Бүлүүгэ кэлэн, биисинэһи улууска хайдах сайыннарар, учуоту сөпкө оҥорор, үлэһиттэри хайдах үлэлэтэр, салайар туһунан сэминээр ыыттыбыт. Элбэх дьон кытынна, билиэн-көрүөн, салгыы үлэлиэн, биисинэһин сайыннарыан баҕарар дьон элбэҕиттэн астынныбыт. Бу көрсүһүүттэн элбэххэ үөрэнэн тарҕастылар. Маны сэргэ ыаллыы сытар Бүлүү улууһун «Табун» маҕаһыыннар тиһиктэрин хаһаайына Джулустан Иванов кэлэн, бизнес-тренинг ыытан барда. Олус интэриэһинэй көрсүһүү буолла».

 

Бэлиэтээн этэр буоллахха, өрөспүүбүлүкэ үрдүнэн 40 тыһыынча урбаанньыт баар. Онтон Үөһээ Бүлүүгэ 600-тэн тахса урбаанньыт улуус социальнай-экономическай сайдыытыгар сүҥкэн кылааты киллэрэн, үлэлии-хамсыы сылдьаллар.

 

Урбаанньыттары барыларын эҕэрдэлиибит, саҕалааһыҥҥыт саргыланнын, үлэҕит табылыннын!

 

Үөһээ Бүлүү улууһугар предпринимателлэри

«Мин биисинэһим» киин бэрэстэбиитэлэ

Николаева Е.В.