8-800-100-58-80

Новости
Форумҥа Нам урбаанньыттара санааларын хото этиннилэр
5 июня 2018

Нам улууһун Бизнес-инкубатора өрөспүүбүлүкэҕэ бастыҥ үлэлээх биир тарбахха баттанар тэрилтэ.

Бэйэтин көрдөрүүлэринэн икки кэнники сылга субуруччу өрөспүүбүлүкэҕэ бастакы миэстэни ылары ситиспит улуустааҕы Бизнес-инкубаторы Алексей Винокуровсалайар.

— Бу күннэргэ Нам улууһугар «Сайдыы төрдө» диэн предпринимателлэр форумнарын ыытыы — үлэбит үрдүк сыанабыла. Улуус предпринимателлэрин кыахтарын, таһымнарын, үлэ уопутун атастаһар форуму ыытарга толору бэлэммитин дакаастаан, СӨ Инвестиционнай сайдыытын уонна предпринимательство министиэристибэтин салалтатын тылбытыгар киллэрбиппит, — диэн кэпсиир Нам улууһун Бизнес-инкубаторын салайааччы Алексей Винокуров.

«Сайдыы төрдө»  форумҥа өрөспүүбүлүкэ 13 улууһуттан, Дьокуускай куораттан 300-чэкэ урбаанньыт кэлэн, икки күн устата бэйэтин үлэтин ис хоһоонун билиһиннэрдэ.  Суолталаах тэрээһиҥҥэ СӨ инвестиционнай сайдыыга уонна предпринимательство дьыалаларыгар миниистирэ Антон  Сафронов кыттыыны ылла.

Салгыы Намнааҕы Бизнес-инкубатор салайааччыта Алексей Винокуров тэрээһин туһунан бу курдук кэпсээтэ:

— Антон Сафронов хайа күн миниистиринэн ананыаҕыттан Намнааҕы Бизнес-инкубатор үлэтин кытта бастакынан билсибитэ. Ол да иһин буолуо, улуус хас биирдии предпринимателин ааҕа билэр.

Кини быыстапкаҕа сылдьан, хас биирдии норуот маастарын, биирдиилээн урбаанньыты кытта сэһэргэстэ, кинилэр олохтоох санааларын иһиттэ.  

«Сайдыы төрдө» диэн форум аата бэйэтэ да этэрин курдук, икки күн устата ыытыллыбыт тэрээһиҥҥэ Нам улууһун урбаанньыттарын ситиһиилэрин төрдүттэн көрдөрөрү, билиһиннэрэри толору  ситистибит диэххэ сөп.

Ол курдук, былаһааккаларынан маастар-кылаастар, быыстапкалар, сэмэнээрдэр  буоллулар. Миниистир Антон Сафронов хас биирдии үлэни олус сэҥээрдэ.

Атахтарыгар турбут урбаанньыттар “Ситиһиилээх саҕалааһын” диэн  маастар-кылаастара үгүс дьоҥҥо олус туһалааҕа билиннэ.  Холобура, “СахаЧэй” тэрилтэ салайааччыта Ньургуйаана Заморщикова, “ЯкутияТехнопарк” резиденнэрэ ситиһиилэрин, үлэлэригэр көрсөр уустук өрүттэри сүбэлиир аҥардаах кэпсээбиттэрин, бу эйгэҕэ үлэлиир дьон утаппыттыы  ылыннылар. «Урбааҥҥа хардыы“, «Билсиһии биржата» курдук санаа атастаһар былаһааккаларга  урбаанньыттар киһини толкуйдатар уонна батыһыннарар уопуттарыттан үллэһиннилэр, бэйэ-бэйэлэриттэн элбэҕи биллилэр-көрдүлэр. Бу форум түмүгүнэн 44 үлэ өрөспүүбүлүкэ урбаанньыттарын инвестбырайыагар киирдэ. “Якутия” венчурнай хампаанньа олохтоох оҥорон таһаарыы пуондатын билиһиннэрдэ. Бу манна үтүмэн үп көрүллэн, олохтоох оҥорон таһаарааччыларга бэриллиэхтээх. Онуоха куонкуруска хайдах кыттары, туох докумуоннар наадаларын кэпсээтилэр, сүбэ-ама биэрдилэр. “Мин бизнеһим” диэн бырайыагы сүрэхтээтибит. Манна  МФЦ курдук докумуоннары, сайаапкалары барытын биирдэ тутан,  “биир түннүк” хайысхатынан үлэлиэхпит.

Өрөспүүбүлүкэтээҕи таһымнаах форуму тэрийбит салайааччы Алексей Винокуров, биллэн турар, тэрээһин бары хайысхатын ымпыгар-чымпыгар диэри ырытта. Ону мин «хаһаана» сылдьан, тус-туспа билиһиннэриэм. Ол курдук, Нам урбаанньыттара туризмы сайыннарыыларын, оскуолаларга Бизнес-инкубатордар хамсааһыннарын боппуруостара бу форумҥа олус дириҥник уонна хорутуулаахтык сырдатыллыбыттар.

Мин форум түмүгүнэн Бизнес-инкубатор салайааччыта бэйэтэ туох санааҕа кэлбитин ыйыппыппар, Алексей Иванович бу курдук санаатын үллэһиннэ:

— Форум кыттааччылара былааска санааларын аһаҕастык этэллэригэр усулуобуйа тэрийэн, “Көҥүл микрофону» олохтообуппут. Манна урбаанньыттар бэйэлэрин балаһыанньаларын холобурдаан, үгүс ыйытыыны биэрдилэр.

 

Онно көстөрүнэн, саамай долгутар боппуруостарынан аукцион ыытыллыыта эбит. Кэнники сылларга үлэ бу көрүҥэ сокуонунан булгуччулаахтык киирэн, кыра тэрилтэлэри олус атахтыыр.  Үгүстэр суббэдэрээккэ эрэ тиксэллэрин, ону даҕаны тэрилтэлэрин эспэт уонна үлэһиттэрин хамнастыыр туһугар эрэ үлэлииллэрин этиннилэр. Бу балаһыанньаттан тахсар суолу тобуларга хас да суолталаах хайысханы сүбэлээтилэр.  Кэрэхсэбиллээҕэ баар, ким да: «Хантан харчы, субсидия булан үлэлиибит?» — диэн ыйыппата. Бу тугу көрдөрөрүй? Урбаанньыттар элбэҕи билэллэрэ-көрөллөрө, быһаарсаллара көһүннэ. Тэрийээччилэр урбаанньыттар тустаах миниистир ыытар үлэтин, сонун сүүрээни киллэриитин кэтии олороллоруттан, хас биирдии сокуону билэллэриттэн олуһун үөрдүбүт. 

Ити курдук, Нам улууһун Бизнес-инкубатора быйылгы сыллааҕы биир улахан өрөспүүбүлүкэтээҕи таһымнаах үлэтигэр хото кыттан, олохтоох урбаанньыттар тэрилтэ үлэтин эрэ буолбакка, СӨ Инвестиционнай сайдыытын уонна предпринимательство дьыалаларыгар министиэристибэтин үлэтин эмиэ улаханнык сыаналыылларын көрдөрдүлэр.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Валерий Федоров түһэриитэ.