Новости
Горнай улууhугар ыhыах ыытылынна
20 июня 2019

Быйыл Маҥаны нэһилиэгэ төрүттэммитэ 125 сыллаах үбүлүөйүнэн Горнай улууһун ыһыаҕа Орто Сурка буолуохтаах. Онон сиэттэрэн Бэрдьигэстээх нэһилиэгин ыһыаҕа арыый эрдэлээн ыытылынна.

Нэһилиэк ыһыаҕын Бэрдьигэстээх салалтата (баһылык М.С.Парфенов) элбэх дьону түмэ тардан, кытыннаран ситиһиилээхтик ыытта. Айылҕа анаабыт курдук, чэмэлкэй күн-дьыл турда. Хайа да ыһыахтан аҕыйаҕа суох Бэрдьигэстээх олохтоохторо, ыалдьыттар, оҕо аймах тоҕуоруһа муһуннулар. Үөрүү-көтүү, ырыа-тойук, оонньуу, көр-нар икки күнү быһа тэрилиннэ.

Ыһыах арыллыыта бары өттүнэн мындырдык толкуйданан (режиссер Е.И.Мартынова) Россияҕа театр, Саха сиригэр сомоҕолоһуу, Горнайга оҕо аймах сылларыгар анаммыта арыллан, дьон-сэргэ сэҥээриитин ылла.

Сэттэ кыталык кыыс, тоҕус туруйа уол арыалдьыттанан киирбит алгысчыт Алексей Румянцев айыылартан көрдөспүтэ туолан, сүөһү иитиитинэн дьарыктанар дьоҥҥо өлгөм үүнүүлээх, элбэх сир астаах, сайдыыны, ситиһиини түстүүр быйаҥнаах сайын буоларыгар эрэннилэр.

Нэһилиэк баһылыга СӨ култууратын үтүөлээх үлэһитэ М.С.Парфенов Ытык дуоҕаны аспытын кэннэ, ыһыах үөрүүлээх чааһыгар кини солбуйааччыта А.Г.Аргунов истиҥник эҕэрдэлээтэ. Бастакынан нэһилиэк дьаһалтатын аатыттан тыһыынчанан мустан олорор дьон иннигэр, нэһилиэк сайдыытыгар үтүөлээх дьону наҕараадалаата: «Бэрдьигэстээх нэһилиэгин сайдыытыгар кылаатын иһин» бэлиэнэн урбаанньыт, меценат, элбэх култуурунай, спортивнай тэрээһиннэри спонсордааччы, «Рикша» такси сулууспатын төрүттээччи Л.В.Винокурованы, урбаанньыт, үлэ бэтэрээнэ, «Тэтим» маркет салайааччыта, элбэх култуурунай, спортивнай тэрээһиннэри спонсордааччы урбаанньыт Т.И.Исакованы, үлэ бэтэрээнэ, СӨ доруобуйа харыстабылын туйгуна Сэмэн, Соппуруон Даниловтар ааттарынан Духуобунас киинин дириэктэрин солбуйааччы В.Н.Кононовы, “Бэрдьигэстээх нэһилиэгин Бочуоттаах олохтооҕо” үрдүк аат бэлиэнэн СӨ үөрэҕириитин туйгунун 30 сыл устата Сэмэн Данилов аатынан оскуолаҕа производственнай үөрэхтээһин маастарынан үлэлиир В.И.Осиповы уонна СӨ физическэй култууратын туйгуна, көҥүл тустууга Россия, Саха сирин чемпионнарын, призердарын иитэн таһаарбыт, спорт эйгэтигэр 40 сыл үлэлээбит Н.Н.Прохоровы.

Улуус баһылыга Н.В.Андреев уйгу быйаҥ ыһыаҕынан эҕэрдэлииригэр, СӨ Ил Дархана А.С.Николаев Горнай улууһун инники сайдыытыгар быһаарар суолталаах дьаһаллары олохтообутун махтанан туран аҕынна. Ол иһигэр аҥардас Манчаары оонньууларын ыытыыга, Горнайга 1444 мөл. солк. тутуу, үлэ барыахтаах. Быйыл икки хочуолу гааска көһөрүүгэ 74 мөл. солк. көрүллэн, аны чоҕунан оттуу аҕыйаан, эһиил Бэрдьигэстээххэ хочуоллар гааска көһөллөрүгэр үлэ салгыы ыытыллыахтааҕын үөрэ-көтө иһитиннэрдэ.

Горнайдары киэҥ сиргэ аатырдыбыт норуодунай поэт С.И.Тарасов, норуодунай артыыска Р.Я.Захарова, биллиилээх суруйааччы П.Д.Аввакумов үбүлүөйдээх сыллара буоларынан, төрөөбүт нэһилиэктэригэр ыһыахтар ыытыллалларын иһитиннэрдэ.

Источник: Ulusmedia.ru

Есть вопрос?
Позвони 8-800-100-58-80