Новости
ХОНУУ СЭЛИЭННЬЭТИН КҮНҮГЭР АТЫЫ-ЭРГИЭН ДЬААРБАҤКАТА ТАРДЫЛЫННА
13 сентября 2018

Балаҕан ыйын 7 күнүгэр «Муома нэһилиэгэ» МТ тэрээһининэн Хонуу Күнэ ыытылынна. Бырааһынньыктыы киэргэммит Кыайыы болуоссатыгар бөһүөлэк олохтоохторо, оҕолор муһуннулар.

Хонуу нэһилиэгин баһылыга А.В. Андреев мустубут дьону бу дьоро күнүнэн эҕэрдэлээтэ, үөрэххэ-үлэҕэ ситиһиилэри баҕарда. Александр Васильевич үйэ аҥара иллээхтик-эйэлээхтик олорор улахан дьиэ кэргэн ийэлэрэ-аҕалара, эбэлэрэ-эһэлэрэ Александра Васильевна, Иннокентий Семенович Старковтары уонна Александра Петровна, Аммос Иванович Черовтары ыал буолбуттара 50 сылынан истиҥник эҕэрдэлээтэ. Өссө да уһуннук олороллоругар баҕарда, бэлэхтэри туттарда.

Бу күн атыы-эргиэн дьаарбаҥката тардылынна. Араас сибэккилэри Надежда, Леонид Никулиннар, Зина Котельникова аҕаллылар. Мустубут дьон декоративнай хаппыыстаны сонургуу көрдүбүт. Араас оҕуруот, сир астарын Татьяна Хохолова, Антонина Садыкова, Надежда Рачинская уо. д. а. туруордулар. Үксэ көрдөрүүгэ кэлбит, сороҕо атыыга турда. Сугун, отон, барыанньа, кабачок, хортуоппуй, оҕурсу, помидор уо. д. а., үрүҥ астан хойуу суорат, сүөгэй бааллар.

Мира Старкова.

Есть вопрос?
Позвони 8-800-100-58-80