Үйэ чиэппэрэ үбүлүөйдээх “Идэһэ-2021” дьаарбаҥкаҕа Эмис нэһилиэгин олохтоохторо 340 тыһ. солк. суумалаах бородууксуйаны атыылаатылар.
Эмис алаастарыгар төлөһүйэн улааппыт ынах, сылгы, сибиинньэтин этин, хойуу үүтүттэн оҥоһуллубут арыытын, көмүс хатырыктааҕын нэһилиэнньэ куруук даҕаны биһириир. Онон тыа дьоно чорботунар астарын барыстаахтык атыылыырга көмө буолар, сыллата ыытыллар “Идэһэ” атыы-эргиэн дьаарбаҥкатыгар биһиги бородууксуйабытын улуус дьоно бу да сырыыга хото ыллылар.
Өссө биир үөрүүлээх сонуммут – тэрээһин кэмигэр биир дойдулаахпыт, нэһилиэк ытык кырдьаҕаһа, сааһын тухары совхоз ферматыгар үлэлээбит Татьяна Никифоровна Новикова “Тыа хаһаайыстыбатын бэтэрээнэ” үрдүк ааты сүктэ. Кинини бу наҕараадатынан истиҥник эҕэрдэлиибит уонна доруобуйаны, этэҥҥэ буолууну баҕарабыт.
Маны тэҥэ улуус дьоно бүттүүн кэтэһэр “Идэһэ” бырааһынньыкпыт үбүлүөйдээх сылынан кинигэ бэлэмнэнэ сылдьарын тыа хаһаайыстыбатын управлениетын начальнига Ион Кононов иһитиннэрдэ. Ахсынньы ыйга күн сирин көрүөхтээх улахан кинигэҕэ киириэхтээх матырыйааллары биһиги нэһилиэкпит туттарда.