×

Следите за новостями в Telegram-канале Центра «Мой бизнес» Якутии

Читать
Новости
Ион Кононов: «Киһи сиир бурдугунан бэйэбитин хааччынар кыах баар»
14 марта 2022

Арҕааҥы дойдулар Россия утары киллэрбит дьаһалларын түмүгэр тас дойдуттан киирии ас лаппа аҕыйыыра күүтүллэр. Улуус, республика бородууктанан бэйэтин хааччынар кыахтаах дуо? Бу туһунан тыа хаһаайыстыбатын управлениетын начальнига Ион Кононов туох санаалааҕый?

— Үөскээбит балаһыанньанан тыа хаһаайыстыбатын министиэристибэтин кытта видео сибээһинэн хас даҕаны мунньах ыытылынна. Онно чопчу сыал-сорук турда – бу күһүҥҥүттэн тыа хаһаайыстыбатын бородууксуйатынан өрөспүүбүлүкэ бэйэтин толору хааччыныахтаах. Эт, үүт ас, оҕуруот аһа, ол иһигэр хортуоппуйбут – барыта бэйэбитигэр оҥоһуллан тахсарыгар кыах баар. Арай ынахтаах дьон 35 000 солк. ылбыт быйылгы уопуттара арыы саппааһыгар үлэлэһиэххэ наада эбит диэн көрдөрдө. „Амма“ ТХППК үпкэ балаһыанньатын тупсардаҕына, нэһилиэнньэттэн үүтү 10-нуу солк. хото тутуоҕа. Онон үөскээбит холобуга олоҕуран миэрэ ыллахпытына арыы сыаната улаханнык үрдүө суоҕа, атыыга хааччаҕа суох тахсыа.

Чуолаан Амма улууһун биир ситиһиитинэн быйыл сиэмэ бурдукпутун бэйэбит бэлэмнэммиппит буолар. „Амма“ совхоз бу хайысхаҕа күүскэ үлэлэһэн 900 тонна бэйэбит бурдукпутун быйыл ыһыахпыт. Тастан киирии сиэмэ бурдук урукку сылларга 35 солк. эбит буоллаҕына, билигин 60-70 солк. тиийдэ. Оттон биһиги бэйэбит хаһаайыстыбаларбытыгар 23 солк. биэрдибит. Сэлиэһинэй, эбиэс, ньэчимиэн саппааһа барыта ыһыыга тиийэр. Ил Дархан өрөспүүбүлүкэ бары улуустара 2024 сылга диэри бэйэ бурдугар көһүөхтээхпит диэн ыйааҕар олоҕуран 2016 сылтан бу өттүгэр үлэ күүскэ баран бастакы түмүктэрэ көстөн эрэллэрэ үөрдэр. Быйыл Амманы хааччыйбыт буоллахпытына, инникитин кэккэ улуустарга атыыга таһаарарга үлэлэһэбит.

Урукку сылларга сүөһү, сылгы сиир бурдугун үүннэрэргэ сүрүн болҕомто ууруллар эбит буоллаҕына, билигин киһи сиир бурдугун үүннэрэн, оҥорон таһаарарга ылсан эрэбит. Өрөспүүбүлүкэ салалтатын кытта улуус дьаһалтата анал оборудование ылары толкуйдуубут. Урут „Амма“ сопхуос, Абаҕа хаһаайыстыбалара бэйэлэрэ миэлиҥсэлээн бурдугу оҥороллоро. Ону сөргүтэр баҕа санаалаахпыт. Оччотугар нэһилиэнньэбитин кэлии аһа суох, сибиэһэй бородуктанан толору хааччыйыахпыт.

Билиҥҥи балаһыанньа туһунан кырдьыктаах сонуннары объясняем.рф сайтка киирэн ааҕыҥ.

Источник