Екатерина Ильина Горнай улууһугар дьоҕус бизнес тэринэн, сакааһынан көмүс киэргэли оҥоруунан дьарыктанар. Кини Бүлүү Халбаакытыттан төрүттээх. Дьокуускайдааҕы 16 №-дээх лицейгэ үөрэнэ сылдьан, 2014 с. Горнай уолугар Айаалга кэргэн тахсан билигин Бэрдьигэстээххэ олороллор.

Екатерина кэпсииринэн, аймахтарыттан бу идэни кини бастакынан баһылаабыт. Эһэтэ, убайа маһынан уһаналлар. «Баҕар, кинилэр мындырдара миэхэ арыый да атыннык бэриллибит буолуон сөп», — диир. Оҕо эрдэҕиттэн иистэнэр, оҕуруонан тиһэр. Көмүс үөрэҕэр оҕуруонан саха киэргэллэрин тиһэрэ көмөлөспүт. Оҥоһук хайдах буолуохтааҕын сүрүнүн билэр буолан, ыарахаттары көрсүбэтэх.

Екатерина урбаанньыт быһыытынан үлэтин 2016 с. саҕалаабыт. Билигин үксүн көмүс оҥоһуктары өрүмүөннээһининэн дьарыгырар. «Сакааска үлэлиир буоларга, көмүһү кутар, оҥорор тэрили атыылаһарга элбэх үп наада. Холобур, «елка» диэн ааттаах гиипсэ киэпкэ хас да араас оҥоһугу биирдэ кутабыт. Аҥардас гиипсэ киэбин хатарар анал оһох, чэпчээбитэ 60 тыһ. солк. буолар», — диэн этэр.

2021 с. буолаары турар Манчаары оонньууларыгар бэйэтин кылаатын киллэриэн баҕарарын көмүс ууһа этэр. Үрүҥ көмүстэн «Манчаары оонньууларын» дьаралыгын, манньыаттары, анал бэлиэлэри оҥортоон, кэлэр ыалдьыттарга удамыр сыанаҕа атыылыыр соруктаах. «Бу аҥардас барыһы киллэринии буолбакка, олохтоох уустар, оҥорон таһаараччылар бэйэлэрин табаардарын, оҥоһуктарын өрөспүүбүлүкэҕэ көрдөрөллөрүгэр тирэх буолуо этэ», — диир Екатерина Спиридоновна.

Аныгы кэм ыччата буолан, урбаан хайысхатыгар сонун көрүүлэрдээх. Холобур, ыал буолар дьон урууга кэтэр биһилэхтэрин бэйэлэрэ оҥостуналларын тэрийэр. Хайдах көмүһү уулларартан саҕалаан, кутуутугар, нарылааһыныгар тиийэ уус ыйыытынан-кэрдиитинэн оҥостунуохтарын сөп. Кэлин, ыал дьон саныылларыгар да астык буоларын курдук. Өссө Екатерина куруһуок тэрийэн, оҕолору көмүскэ уһуйуон баҕара.

Тимиргэ, көмүскэ эр дьон эрэ ылсар дьарыктара дии саныырым. Улаханнык алҕаһыыр эбиппин. Ону Горнай улууһун олохтооҕо бэйэтин үлэтинэн, толкуйунан дакаастаата.

Сахалар тимиртэн, көмүстэн оҥоһуктара тас дойдуларга үрдүктүк сыаналанар. Атын омуктар мындыр, тупсаҕай көстүүнү сөҕөллөр. Сэбиэскэй бириэмэҕэ сүтэ сыһан баран, хаттаан тиллибит төрүт дьарыкпыт үрдүк философиялааҕа билининнэ. Онно кэрэ аҥардар кытталлара өссө дириҥ толкуйу үөскэтэр.

Ааптар: Василий Тимофеев.